Ўзбекистон «Спутник V» вакцинасини Россиядан сертификат олинганидан кейин ишлаб чиқаради. Бу ҳақда Фармацевтика тармоғини ривожлантириш агентлиги директори Сардор Кариевга таяниб, «Gazeta.uz» хабар берди.
Кариевнинг таъкидлашича, Ўзбекистонда Jurabek Laboratories МЧЖ томонидан «Спутник V» вакцинасининг намуна дозалари ишлаб чиқарилган ва Россиянинг Гамалея институтига синовдан ўтказиш ва сертификация қилиш учун юборилган.
«Августнинг биринчи ҳафтасига ижобий жавобни кутяпмиз. Ундан кейин (Jurabek Laboratories) цехида ишлаб чиқарилади», — деди Кариев.
Jurabek Laboratories ишлаб чиқариш директори Фаррух Лутфуллаевнинг нашрга таъкидлашича, завод томонидан биринчи босқичда 2 миллион доза «Спутник V» ва 10 миллион доза хитой-ўзбек вакциналарини ишлаб чиқариш режалаштирилган.
«Спутник V» вакцинаси қачон ишлаб чиқарилиши бўйича саволга у Гамалея институтидан хом ашё келишини кутишаётганлигини таъкидлади. «Август ўрталарида қуйишни бошласак, август охирида етказиб беришни режалаштиряпмиз», — деди у.
Унинг қўшимча қилишича, хитой-ўзбек вакцинасини ишлаб чиқариш масалалари ҳозирда Хитойдан келган делегация томонидан ўрганилмоқда. Заводнинг техник ва технологик имкониятларига ижобий баҳо берилганидан кейин, Хитойга текширув учун Ўзбекистонда қуйилган вакцина намунаси юборилади ва синовдан ўтказилади.
Бундан аввал Шавкат Мирзиёев август ойининг дастлабки ҳафтасидан бошлаб Ўзбекистонда «Спутник V» вакцинаси ишлаб чиқариш бошланишини маълум қилгани, Ўзбекистонга 1,2 млн доза Pfizer вакцинаси олиб келиниши ҳамда Шавкат Мирзиёев ҳокимларга вакцинация бўйича ишларни қаттиққўллик билан назоратга олишни топширгани ҳақида хабар берилганди.
Изоҳ (0)