Tokio—2020 Olimpiadasining 28-iyul kungi musobaqalari o‘z yakuniga yetdi. Yozgi o‘yinlarning rasmiy beshinchi kunida 23 ta medallar shodasi o‘ynaldi.
Umumiy ro‘yxatda hamon musobaqa mezbonlari yetakchilik qilmoqda. Xitoy so‘nggi kunlardan farqli ravishda AQShni ortda qoldirib, ikkinchi o‘ringa chiqib oldi. Buyuk Britaniya kuchli beshlikdagi o‘rnini Avstraliyaga bo‘shatib bergan. 27-iyulga qadar birorta ham oltin qo‘lga kirita olmay quyi pog‘onalarda yurgan Niderlandiya 28-iyulda bir yo‘la ikkita oltinga erishdi va top-10 likka kirdi.
O‘zbekiston delegatsiyasi 28-iyul kungi bronza medalidan keyin yanada quyiga tushib ketishdan qutulib qoldi. O‘zbekiston bittadan oltin va bronza bilan umumiy ro‘yxatda 25—27-o‘rinda bormoqda.
Og‘ir atletikada -59 kg vazn toifasida Turkmaniston sharafini himoya qilgan Polina Guryeva Tokio—2020 kumush medaliga sazovor bo‘ldi. Bu Turkmaniston uchun Olimpiya o‘yinlari tarixidagi ilk medal bo‘ldi. Shu vaqtga qadar turkmanlar yozgi Olimpiadada birorta ham medalga ega chiqa olmagandi.
Shu vaqtga qadar jami 303 ta medal (95 tadan oltin va kumush, 113 ta bronza) o‘z egalariga topshirildi. 62 ta mamlakat vakillari kamida bittadan sovringa ega bo‘ldi. Shuningdek, 35 ta delegatsiya, jumladan, O‘zbekiston ham o‘z hisobiga oltin medal yozdirib qo‘ygan.
Tokio—2020 medallar reytingi (top-10)
- Yaponiya – 13-4-5 (22)
- Xitoy – 12-6-9 (27)
- AQSh – 11-11-9 (31)
- ROQ (Rossiya) – 7-10-6 (23)
- Avstraliya – 6-1-9 (16)
- Buyuk Britaniya – 5-6-5 (16)
- Janubiy Koreya – 4-2-5 (11)
- Germaniya – 3-2-5 (10)
- Fransiya – 3-2-3 (8)
- Niderlandiya – 2-6-3 (11)
Izoh (0)