Tokio—2020 Olimpiadasining 25-iyul kungi musobaqalari yakunlandi. O‘zbekistonlik sportchilar o‘nta yo‘nalishda o‘z ishtirokini o‘tkazdi.
Akademik eshkak eshish
Dastlabki kungi musobaqalarda 4-o‘rinni egallagan Shahboz Xolmirzayev va Sobir Safaraliyev juftligi o‘tish musobaqasida qatnashdi. Unda ham to‘rtinchi natijani qayd etgan o‘zbekistonlik sportchilar final yo‘llanmasidan quruq qoldi. Ular 13—18-o‘rinlar uchun kechadigan bahsda ishtirok etadi.
Taekvondo
25-iyul kungi bahslar Ulug‘bek Rashidovning (-68 kg) muvaffaqiyatli starti bilan boshlanib, tarixiy finishi bilan yakunlandi. Ulug‘bek 1/16 finalda malilik Seydu Mofanani 38:17 hisobida mag‘lub etdi. O‘zbekistonlik sportchi chorak final yo‘llanmasi uchun jangda 3 karra jahon chempioni, Olimpiya o‘yinlarining 2 karra sovrindori, ushbu vazn toifasining birinchi raqamli sportchisi janubiy koreyalik Li De Hun bilan asosiy vaqtda 19:19 hisobida qayd etdi. Bahs taqdirini hal qilgan “Oltin zarba”da Rashidov 2 ochko qo‘lga kiritib, chorak finalga yo‘l oldi. Rashidov 1/4 finalda eronlik Mirhoshim Hussainini 34:22 hisobida yengdi. Rashidov yarim finalda Bosniya va Gersegovina vakili Nedzad Hushichni 28:5 hisobida yengib, O‘zbekiston uchun dastlabki medalni naqd qildi. Finalda esa uch raund yakuniga ko‘ra Bredli Sindenni 32:29 hisobida mag‘lub etib, O‘zbekistonga dastlabki medalni taqdim etdi.
Shu tariqa, Rashidov Olimpiada tarixida oltin medalga sazovor bo‘lgan eng yosh o‘zbekistonlik sportchiga aylandi. Shuningdek, bu o‘zbekistonliklar uchun taekvondo bo‘yicha Olimpiya o‘yilarida qo‘lga kiritilgan ilk medal bo‘ldi.
Boks
Dastlabki kundagi muvaffaqiyatsiz natijalardan farqli ravishda 25-iyul kuni o‘z chiqishini amalga oshirgan uch nafar o‘zbekistonlik keyingi bosqichga yo‘l oldi. Bahslarni Tursunoy Rahimova (-51 kg) tarixiy g‘alaba bilan boshladi. 1/16 finalda polshalik Sandra Drabikni yenggan Rahimova Olimpiya o‘yinlarida g‘alabaga erishgan o‘zbekistonlik ilk ayol bokschi bo‘ldi. Uning keyingi bosqichdagi raqibi turkiyalik Buse Naz Chakiroo‘g‘lu bo‘ladi. Jang 29-iyul kuni bo‘lib o‘tadi.
Elnur Abduraimov (-63 kg) azaliy raqibi bo‘lmish Mo‘g‘uliston vakili Chinzorig Baatarsuxga qarshi jang qildi va qiyinchilik bilan g‘alaba qozonib, 1/8 finalga chiqdi. Nimchorak finalda Abduraimov tojikistonlik Bahodur Usmonovga qarshi ringga ko‘tariladi.
Dilshod Ro‘zmetov (-81 kg) irlandiyalik Emmet Brennanni taslim etib, keyingi bosqichga yo‘llanma oldi. Ro‘zmetov 1/8 finalda kelib chiqishi Kubadan bo‘lgan va Olimpiya o‘yinlarida Ozarbayjon bayrog‘i ostida chiqayotgan Alfonso Domingesga qarshi jang qiladi.
Dzyudo
Dzyudo bahslari muvaffaqiyatsizlik ikkinchi kunda ham davom etdi. Avvaliga Diyora Keldiyorova (-52 kg) mo‘g‘ulistonlik Soserbaram Lxagvasurenga mag‘lub bo‘ldi va musobaqa bilan xayrlashdi. Sardor Nurillayev (-66 kg) 1/16 finalda Moldova vakili Denis Viyeruga qarshi kurash olib bordi. Unda o‘zbekistonlik sportchi jarohat sabab jangni davom ettira olmadi va Olimpiadadagi yurishini to‘xtatdi.
Velosport
Olga Zabelinskaya 137 kilometrga kechgan guruh poygasi yo‘nalishida 67 ishtirokchi orasida 9-bo‘lib marra chizig‘ini kesib o‘tdi. U ushbu masofani 3 soat 54 daqiqa 31 soniyada bosib o‘tdi. Shu tariqa Zabelinskaya velosport bo‘yicha Olimpiya o‘yinlarida ishtirok etgan ilk o‘zbekistonlik ayol sportchi sifatida tarixga kirdi.
Sport gimnastikasi
Oksana Chusovitina saralash bahslarida tayanib sakrash yo‘nalishida 14.166 ochko jamg‘ardi. Biroq bu final yo‘llanmasi uchun kamlik qildi va Olimpiada afsonasi Tokio—2020 dagi ishtirokini yakunladi. Shu tariqa 46 yoshli Oksana o‘zining sakkizinchi Olimpiadasida ishtirok etdi va bu borada mutlaq rekordchiga aylandi. Oksana ushbu Olimpiada professional faoliyatidagi so‘nggisi bo‘lishini ma’lum qildi.
Og‘ir atletika
-67 kg vazn toifasida O‘zbekiston sharafini himoya qilgan Adhamjon Ergashev dast ko‘tarish mashqida 139 kg, siltab ko‘tarishda esa 173 kg og‘irlikni o‘ziga bo‘ysundirdi. Ikki kurash bahslariga ko‘ra Ergashev umumiy hisobda 312 kg og‘irlik bilan musobaqani oltinchi o‘rinda yakunladi.
Shu tariqa Olimpiadaning ikkinchi kunida O‘zbekiston vakillari bitta oltin medalni qo‘lga kiritdi. Uch nafar bokschi o‘z yurishini davom ettiradigan bo‘ldi. Besh nafar sportchi uchun esa musobaqa yakunlandi. O‘zbekiston delegatsiyasi ikki kunlik natijalar bo‘yicha (1 ta oltin) medallar reytingida 11—16-o‘rinlarni egallab turibdi.
Izoh (0)