Tokio—2020 Olimpiadasining 25-iyul, yakshanba kungi musobaqalari o‘tkazilmoqda.
Sport gimnastikasi bo‘yicha O‘zbekiston nomidan ishtirok etgan Oksana Chusovitina saralash bahsidagi ishtirokini yakunladi. Oksana tayanib sakrash yo‘nalishida 14.166 ochko jamg‘arib, 11-o‘rinni egalladi va final yo‘llanmasini qo‘lga kirita olmadi. Qayd etish lozim, oldinda sportchilarning yana bir guruhi bor. Agar ushbu guruhdan hech kim Oksanadan yaxshiroq natija ko‘rsata olmasa, u 11-o‘rinda qoladi.
Shu tariqa 46 yoshli Oksana o‘zining 8-Olimpiadasida ishtirok etdi va bu borada mutlaq rekordchiga aylandi. Oksana ushbu Olimpiada professional faoliyatidagi so‘nggisi bo‘lishini ma’lum qildi.
Eslatib o‘tamiz, Milliy olimpiya qo‘mitasi matbuot xizmati Olimpiada ochilish marosimida O‘zbekistonning ikki bayroqdoridan biri Oksana Chusovitina bo‘lishini e’lon qilingandi. Ikkinchisi esa boks bo‘yicha terma jamoa a’zosi Bobousmon Boturov bo‘lishi lozim edi. Biroq ochilish marosimiga bir kun qolganda bayroqdorlar o‘zgardi va marosimda bokschi Bahodir Jalolov va taekvondochi Nigora Tursunqulova O‘zbekiston bayroqdorlari bo‘lishi e’lon qilindi.
Mazkur holat yuzasidan MOQ bosh kotibi Oybek Qosimov bayonot bergan, O‘zbekiston bayroqdorlarini tanlashda har bir sport turi bo‘yicha musobaqalar taqvimi, shuningdek, barcha delegatlar va sportchilarning fikri inobatga olingani haqida aytgandi.
Oksana Chusovitina bayroqdorlar o‘zgargani borasida hech kim unga izoh va tushuntirish bermagani, bu voqeadan keyin ishtiyoqi so‘ngani haqida gapirdi.
Turizm va sport vazirligi esa o‘z bayonotida Chusovitina o‘zining so‘nggi Olimpiadasiga jiddiy hozirlik ko‘rish maqsadida o‘z o‘rnini bo‘shatgani haqida ma’lum qildi.
Izoh (0)