Токио—2020 Олимпиадасининг 25 июль кунги мусобақалари якунланди. Ўзбекистонлик спортчилар ўнта йўналишда ўз иштирокини ўтказди.
Академик эшкак эшиш
Дастлабки кунги мусобақаларда 4-ўринни эгаллаган Шаҳбоз Холмирзаев ва Собир Сафаралиев жуфтлиги ўтиш мусобақасида қатнашди. Унда ҳам тўртинчи натижани қайд этган ўзбекистонлик спортчилар финал йўлланмасидан қуруқ қолди. Улар 13—18-ўринлар учун кечадиган баҳсда иштирок этади.
Таэквондо
25 июль кунги баҳслар Улуғбек Рашидовнинг (-68 кг) муваффақиятли старти билан бошланиб, тарихий финиши билан якунланди. Улуғбек 1/16 финалда малилик Сейду Мофанани 38:17 ҳисобида мағлуб этди. Ўзбекистонлик спортчи чорак финал йўлланмаси учун жангда 3 карра жаҳон чемпиони, Олимпия ўйинларининг 2 карра совриндори, ушбу вазн тоифасининг биринчи рақамли спортчиси жанубий кореялик Ли Де Ҳун билан асосий вақтда 19:19 ҳисобида қайд этди. Баҳс тақдирини ҳал қилган «Олтин зарба»да Рашидов 2 очко қўлга киритиб, чорак финалга йўл олди. Рашидов 1/4 финалда эронлик Мирҳошим Ҳуссаинини 34:22 ҳисобида енгди. Рашидов ярим финалда Босния ва Герцеговина вакили Недзад Ҳушични 28:5 ҳисобида енгиб, Ўзбекистон учун дастлабки медални нақд қилди. Финалда эса уч раунд якунига кўра Бредли Синденни 32:29 ҳисобида мағлуб этиб, Ўзбекистонга дастлабки медални тақдим этди.
Шу тариқа, Рашидов Олимпиада тарихида олтин медалга сазовор бўлган энг ёш ўзбекистонлик спортчига айланди. Шунингдек, бу ўзбекистонликлар учун таэквондо бўйича Олимпия ўйиларида қўлга киритилган илк медал бўлди.
Бокс
Дастлабки кундаги муваффақиятсиз натижалардан фарқли равишда 25 июль куни ўз чиқишини амалга оширган уч нафар ўзбекистонлик кейинги босқичга йўл олди. Баҳсларни Турсуной Раҳимова (-51 кг) тарихий ғалаба билан бошлади. 1/16 финалда польшалик Сандра Драбикни енгган Раҳимова Олимпия ўйинларида ғалабага эришган ўзбекистонлик илк аёл боксчи бўлди. Унинг кейинги босқичдаги рақиби туркиялик Бусе Наз Чакироўғлу бўлади. Жанг 29 июль куни бўлиб ўтади.
Элнур Абдураимов (-63 кг) азалий рақиби бўлмиш Мўғулистон вакили Чинзориг Баатарсухга қарши жанг қилди ва қийинчилик билан ғалаба қозониб, 1/8 финалга чиқди. Нимчорак финалда Абдураимов тожикистонлик Баҳодур Усмоновга қарши рингга кўтарилади.
Дилшод Рўзметов (-81 кг) ирландиялик Эммет Бреннанни таслим этиб, кейинги босқичга йўлланма олди. Рўзметов 1/8 финалда келиб чиқиши Кубадан бўлган ва Олимпия ўйинларида Озарбайжон байроғи остида чиқаётган Алфонсо Домингесга қарши жанг қилади.
Дзюдо
Дзюдо баҳслари муваффақиятсизлик иккинчи кунда ҳам давом этди. Аввалига Диёра Келдиёрова (-52 кг) мўғулистонлик Сосербарам Лхагвасуренга мағлуб бўлди ва мусобақа билан хайрлашди. Сардор Нуриллаев (-66 кг) 1/16 финалда Молдова вакили Денис Виеруга қарши кураш олиб борди. Унда ўзбекистонлик спортчи жароҳат сабаб жангни давом эттира олмади ва Олимпиададаги юришини тўхтатди.
Велоспорт
Олга Забелинская 137 километрга кечган гуруҳ пойгаси йўналишида 67 иштирокчи орасида 9-бўлиб марра чизиғини кесиб ўтди. У ушбу масофани 3 соат 54 дақиқа 31 сонияда босиб ўтди. Шу тариқа Забелинская велоспорт бўйича Олимпия ўйинларида иштирок этган илк ўзбекистонлик аёл спортчи сифатида тарихга кирди.
Спорт гимнастикаси
Оксана Чусовитина саралаш баҳсларида таяниб сакраш йўналишида 14.166 очко жамғарди. Бироқ бу финал йўлланмаси учун камлик қилди ва Олимпиада афсонаси Токио—2020 даги иштирокини якунлади. Шу тариқа 46 ёшли Оксана ўзининг саккизинчи Олимпиадасида иштирок этди ва бу борада мутлақ рекордчига айланди. Оксана ушбу Олимпиада профессионал фаолиятидаги сўнггиси бўлишини маълум қилди.
Оғир атлетика
-67 кг вазн тоифасида Ўзбекистон шарафини ҳимоя қилган Адҳамжон Эргашев даст кўтариш машқида 139 кг, силтаб кўтаришда эса 173 кг оғирликни ўзига бўйсундирди. Икки кураш баҳсларига кўра Эргашев умумий ҳисобда 312 кг оғирлик билан мусобақани олтинчи ўринда якунлади.
Шу тариқа Олимпиаданинг иккинчи кунида Ўзбекистон вакиллари битта олтин медални қўлга киритди. Уч нафар боксчи ўз юришини давом эттирадиган бўлди. Беш нафар спортчи учун эса мусобақа якунланди. Ўзбекистон делегацияси икки кунлик натижалар бўйича (1 та олтин) медаллар рейтингида 11—16-ўринларни эгаллаб турибди.
Изоҳ (0)