Taekvondo bo‘yicha Tokio—2020 Olimpiadasi chempioni Ulug‘bek Rashidov g‘oliblikdan keyin o‘z fikrlari bilan o‘rtoqlashdi.
Ehtiroslarimni ta’riflashga til ojiz. Bu yo‘lda ishtirok etgan barchaga rahmat aytaman. Shu sharoitlarni muhayyo qilgan Prezidentimiz, Olimpiya qo‘mitasi, Sport vazirligi va barchaga minnatdorchilik bildiraman.Ulug‘bek 1/16 finalda malilik Seydu Mofanani 38:17 hisobida mag‘lub etdi. O‘zbekistonlik sportchi chorak final yo‘llanmasi uchun jangda 3 karra jahon chempioni, Olimpiya o‘yinlarining 2 karra sovrindori, ushbu vazn toifasining birinchi raqamli sportchisi janubiy koreyalik Li De Hun bilan asosiy vaqtda 19:19 hisobida qayd etdi. Bahs taqdirini hal qilgan “Oltin zarba”da Rashidov 2 ochko qo‘lga kiritib, chorak finalga yo‘l oldi. Rashidov 1/4 finalda eronlik Mirhoshim Hussainini 34:22 hisobida yengdi. Rashidov yarim finalda Bosniya va Gersegovina vakili Nedzad Hushichni 28:5 hisobida yengib, O‘zbekiston uchun dastlabki medalni naqd qilgandi. Finalda esa uch raund yakuniga ko‘ra Bredli Sindenni 32:29 hisobida mag‘lub etdi.G‘alabani kimga bag‘ishlagani borasida
Bu g‘alabamni amakimga bag‘ishlayman. Taxminan 10-iyulda Tokioga kelgan bo‘lsak, 15-iyulda amakim 68 yoshida vafot etganini eshitdim. Bu ishni uning uchun ham amalga oshirishni o‘zimga va’da bergandim. Bu g‘alabamni unga bag‘ishlayman.
Murabbiyi Pavel Xan haqida
Bu murabbiy menga juda yaqin. U qadrdonim. Uning qo‘l ostiga kelganimda 5-6 yoshda edim. Bu yo‘lni u bilan birga bosib o‘tdik. U eng zo‘r murabbiy! Uch yil avval yoshlar Olimpiadasida bu kabi yutuqni qo‘lga kiritamiz deb o‘ylab ham ko‘rmagandik. Biroq hammasi xudoning qo‘lida. Unga duo qiling va albatta, natija erishasiz.
Nomdor raqiblarga qarshi kurash borasida
Bolaligimda Li De Hunning janglarini doim tomosha qilib borardim. Buni futbol deb tasavvur qilsak, u xuddi Ronaldu va Messidek mashhur. U taekvondodagi eng nomdor, eng mashhur sportchi. Unga qarshi jang qilish men uchun ulkan sharaf bo‘ldi. Unga qarshi jang oldidan murabbiy menga shunday dedi: “U 10 yildan beri top-darajada, 11 yil juda ko‘plik qiladi. Yoshlarning ham vaqti keldi”.
Finalda duch kelgan britaniyalik raqib ham juda kuchli. U 2019-yilda De Hunni mag‘lub etib, jahon chempioniga aylangandi. Har bir raqib kuchli edi, bu yerda kuchsizlar yo‘q.
Ulug‘bek Rashidov, Olimpiada chempioni
Rashidovning finaldagi raqibi Bredli Sinden -68 kg vazn toifasida amaldagi Jahon chempioni hisoblanadi. U 2019-yilda Manchester shahrida o‘tkazilgan musobaqada g‘oliblikni qo‘lga kiritgandi. Sinden shuningdek, ushbu vazn toifasining ikkinchi raqamli vakili hisoblanadi.
Ma’lumot uchun, Ulug‘bek Rashidov 2002-yil 23-mart kuni Toshkent shahrida tug‘ilgan.
U 2018-yilda Buenos-Ayresda (Argentina) bo‘lib o‘tgan 2018-yilgi yozgi o‘smirlar Olimpiya o‘yinlarida 48 kilogrammgacha vazn toifasida kumush medalini qo‘lga kiritgan, finalda rossiyalik sportchi Dmitriy Shishkoga imkoniyatni boy berib qo‘ygan.
2019-yilda esa taekvondo bo‘yicha o‘smirlar o‘rtasidagi Osiyo chempionatida 55 kilogrammgacha vazn toifasida oltin medalga ega chiqqan. Xuddi shu yili u Butunjahon armiya o‘yinlarida 58 kilogrammgacha vazn toifasida oltin medalni qo‘lga kiritadi, Ulug‘bek hal qiluvchi bahsda xitoylik raqibi Lyan Yuyshuayni taslim etgandi.
Izoh (0)