Mercedes-Benz kompaniyasi yangi Vision EQXX konseptiga bo‘lgan qiziqishni oshiruvchi tizerni e’lon qildi. Bu Shtutgartdagi ishlab chiqaruvchi tomonidan e’lon qilingan eng uzoq masofaga — 1200 kilometrga yura oladigan elektrokar hisoblanadi. Taqqoslash uchun, EQS modeli bir marta quvvatlanish orqali WLTP sikli bo‘yicha 770 kilometr masofa bosa oladi, deb xabar beradi Motor.
Vision EQXX Mercedes-Benz shou-karining birinchi tizerlari 2020-yilning oktabrida namoyish etilgandi, biroq ular juda qisqa bo‘lgan: faqatgina avtomobil sharpasi va old qismi ko‘ringan.
Yangi suratda faralar blokini birlashtirib turuvchi yorug‘lik diodli chiziq, “shishirilgan” g‘ildirak arkalari va kapotdagi ikkita ventilyatsion tirqishlarni ko‘rish mumkin. Elektrokar haqida boshqa ma’lumotlar hozircha e’lon qilinmagan. U “Formula-1” uchun dvigatellar yaratish bilan shug‘ullanuvchi Mercedes AMG High Performance Powertrains bilan hamkorlikda ishlangani ma’lum, xolos.
Vision EQXX asosini Modular Electric Architevture (MEA) elektron arxitekturasi tashkil etishi mumkin. Batareya 800 volt kuchlanish ostida ishlaydi va 250 kilovatt quvvatga ega. Akkumulyator batareyasi bir marta to‘liq quvvatlanish orqali Pekindan Shanxaygacha bo‘lgan 1200 kilometrdan ortiq masofani bosib o‘tishga qodir.
Yangi strategiyada ko‘ra, Mercedes-Benz keyingi o‘n yillikda ichki yonuv dvigatellaridan butkul voz kechadi. 2030-yilga borib brend har bir mavjud modelning elektr versiyasini chiqarishga va’da bergan.
Eslatib o‘tamiz, 2020-yilning iyulida Mercedes-AMG GT Black Series superkari, noyabrda esa hashamatli Mercedes S-Class sedani taqdim etilgandi.
Izoh (0)