Mercedes-Benz kompaniyasi o‘zining premium sinfiga kiruvchi EQS elektrosedanini taqdim etdi

Mercedes-Benz kompaniyasi o‘zining EQS lyuks elektrosedanini taqdim etdi. Yangi model an’anaviy ichki yonuv dvigateliga ega S-Class sedani o‘rnini egallashi kutilmoqda, deb xabar beradi “Afisha.uz”.

Mercedes-Benz EQS 2019-yili shu nom ostida taqdim etilgan konsept dizaynining ko‘plab jihatlarini o‘zida mujassam etgan. Elektrokar tashqi ko‘rinishi old tomondan qarshilik koeffitsiyentini kamaytirish hisobiga loyihalangan — Mercedes muhandislari tarixda birinchi bor 0,20 ko‘rsatkichga erishgan. Bu yangi model kamroq energiya sarflashiga yordam beradi.

EQS saloni kompaniyaning so‘nggi konsept-karlari uslubidagi futuristik dizaynga ega bo‘lgan. Unda diagonali 56 dyuymga teng MBUX Hyperscreen multimedia tizimi joylashgan. Tizim qurilmalar paneli va old yo‘lovchi uchun 12,3 dyuymli ekranni, shuningdek, 17 dyuymli markaziy sensor ekranni o‘z ichiga oladi.

Pemium sedan kapoti ostiga Mercedes muhandislari 331 ot kuchini taqdim etishga qodir dvigatel o‘rnatgan. Bu kabi elektrodvigatel soatiga 100 kilometr tezlikka 6,2 soniyada erishishga qodir. Shuningdek, modelning 524 ot kuchiga ega versiyasi ham sotuvga chiqadi — u soatiga 100 kilometr tezlikka 4,3 soniyada erishadi.

Bundan tashqari, nemis avtokonserni sedanning quvvati 725 ot kuchiga ega AMG-versiyasi ustida ham ish olib bormoqda. Barcha versiyalarda mashinaning orqa g‘ildiragi shahar yo‘llaridagi burilishlarda manyovrchanlikni oshirish uchun 4,5 darajaga burila oladi. Shu sababli 5 metrli EQS’ning qayrilib olishi uchun 10,5 metrli diametr kifoya qiladi.

Mercedes’dagilarning ma’lum qilishicha, yangi sedanga uning jamlanmasidan kelib chiqib 350 tagacha turli datchik va sensorlar o‘rnatiladi. Ularning barchasi avtopilot va “aqlli” funksiyalarga javob beradi. Masalan, Mercedes-Benz EQS o‘z egasi oldiga kelayotganida avtomatik ravishda eshik tutqichini chiqaradi va haydovchi yaqinlashganda eshikni biroz ochadi.

Qo‘shimcha haq evaziga Drive Pilot yarim avtomat boshqaruv tizimidan ham foydalanish mumkin. Biroq u faqatgina soatiga 60 kilometrgacha bo‘lgan tezlikda hamda Germaniyaning ayrim avtomagistrallarida ishlaydi.

Taqdimot davomida avtomobil narxiga to‘xtalib o‘tilmagan, biroq ta’kidlanishicha, mashina 2021-yilning kuzida sotuvga chiqadi.

Eslatib o‘tamiz, 2020-yilning iyulida Mercedes-AMG GT Black Series superkari, noyabrda esa hashamatli Mercedes S-Class sedani taqdim etilgandi.