Mercedes-Benz компанияси янги Vision EQXX концептига бўлган қизиқишни оширувчи тизерни эълон қилди. Бу Штутгартдаги ишлаб чиқарувчи томонидан эълон қилинган энг узоқ масофага — 1200 километрга юра оладиган электрокар ҳисобланади. Таққослаш учун, EQS модели бир марта қувватланиш орқали WLTP цикли бўйича 770 километр масофа боса олади, деб хабар беради Motor.
Vision EQXX Mercedes-Benz шоу-карининг биринчи тизерлари 2020 йилнинг октябрида намойиш этилганди, бироқ улар жуда қисқа бўлган: фақатгина автомобиль шарпаси ва олд қисми кўринган.
Янги суратда фаралар блокини бирлаштириб турувчи ёруғлик диодли чизиқ, «шиширилган» ғилдирак аркалари ва капотдаги иккита вентиляцион тирқишларни кўриш мумкин. Электрокар ҳақида бошқа маълумотлар ҳозирча эълон қилинмаган. У «Формула-1» учун двигателлар яратиш билан шуғулланувчи Mercedes AMG High Performance Powertrains билан ҳамкорликда ишлангани маълум, холос.
Vision EQXX асосини Modular Electric Architevture (МЕА) электрон архитектураси ташкил этиши мумкин. Батарея 800 вольт кучланиш остида ишлайди ва 250 киловатт қувватга эга. Аккумулятор батареяси бир марта тўлиқ қувватланиш орқали Пекиндан Шанхайгача бўлган 1200 километрдан ортиқ масофани босиб ўтишга қодир.
Янги стратегияда кўра, Mercedes-Benz кейинги ўн йилликда ички ёнув двигателларидан буткул воз кечади. 2030 йилга бориб бренд ҳар бир мавжуд моделнинг электр версиясини чиқаришга ваъда берган.
Эслатиб ўтамиз, 2020 йилнинг июлида Mercedes-АМG GТ Black Series суперкари, ноябрда эса ҳашаматли Mercedes S-Class седани тақдим этилганди.
Изоҳ (0)