Tokio—2020 Olimpiadasida 24-iyul kungi musobaqalar start oldi.
O‘zbekistonlik sportchilar ichida ishtirokni birinchi bo‘lib o‘q otish bo‘yicha terma jamoa vakili Muxtasar Tohirova boshlab berdi. 10 metrdan miltiqdan o‘q otish bo‘yicha Tohirova 622.2 ball to‘plab, 32-natijani qayd etdi.
Qilichbozlikning sablya yo‘nalishida harakat qilgan 19 yoshli o‘zbekistonlik sportchi Sherzod Mamutov ruminiyalik Yulian Teodosiuga qarshi jang olib bordi va 11:15 hisobida imkoniyatni boy berib qo‘ydi.
Qilichbozlikning shpaga yo‘nalishida Malika Hakimova xitoylik Yiven Sunga qarshi bahs olib bordi va 10:15 hisobida yutqazib qo‘ydi.
Bokschi Shahnoza Yunusova (-69 kg) 1/16 finalda polshalik Karolina Kosevskaga qarshi ringga ko‘tarildi va 0:5 hisobida mag‘lub bo‘ldi.
Akademik eshkak eshish bo‘yicha Sobir Safaraliyev va Shahboz Xolmirzayev juftligi dastlabki chiqishni yakunladi. 2000 metrlik masofani bosib o‘tish uchun o‘zbekistonlik sportchilar 6:44.98 daqiqa vaqt sarfladi va 4-o‘rinni egalladi. Endilikda ular qo‘shimcha saralash bosqichida ishtirok etadi.
Dzyudochi Sharofiddin Lutfullayev (-60 kg) 1/8 finalda ukrainalik Artyom Lesiukka qarshi kurash olib bordi va imkoniyatni boy berdi.
Ayni vaqtda tennischi Denis Istomin hindistonlik Sumit Nagalga qarshi bahs olib bormoqda. Velopoygachi Murodjon Xolmurodov ham g‘oliblik uchun kurash olib boryapti. Bokschi Sanjar Tursunov ishtirokidagi jang soat 10:10 dan keyin boshlanadi. O‘zbekistonlik sportchilarning 24-iyul kungi ishtiroki sport gimnastikachisi Rasuljon Abdurahimovning soat 15:30 dagi chiqishidan keyin yakunlanadi.
Izoh (0)