“Bu yil reanimatsiya bolalarga to‘la, o‘tgan yili bunday holat bo‘lmagan” — mutaxassis hozirgi kunda vaksinatsiya nima uchun zarurligiga izoh berdi

Vaksina haqidagi mish-mishlar emlana olmaydigan aholi qatlamiga zarar yetkazishi mumkin. Bu haqda 23-iyul kuni AOKAda bo‘lib o‘tgan matbuot anjumanida Innovatsion rivojlanish vazirligi huzuridagi Ilg‘or texnologiyalar markazi biotexnologiyalar laboratoriyasi mudiri Dilbar Dalimova aytib o‘tdi, deya xabar bermoqda “Daryo” muxbiri.

Dilbar Dalimovaning ta’kidlashicha, hozirgi kasallik, og‘ir holatlar ko‘payayotgan bir vaziyatda vrachlar ma’lumot berishdan avval mavzuni chuqur o‘rganishlari kerak.

“Agar qanaqadir ma’lumotlar bo‘lmasa, so‘ranglar, biz ochiqmiz, barcha ma’lumotlar bor bizda. Lekin bunday qilmagan holda, OAVlarda chiqib vaksina haqida bilmasdan har xil gapirib, bu vaksina o‘limga olib kelarkan, degan va hokazo gaplarni tarqatmanglar”, – dedi markaz mas’ul xodimi.

Dalimovaning alohida qayd etishicha, tibbiyot xodimlari va olimlar tarqatayotgan ma’lumotlar aholiga qattiq ta’sir qilmoqda, natijada kasalliklar ko‘payib, hatto bolalar orasida og‘ir holatlar kuzatilmoqda.

“Markaz Zangota-1 va Zangota-2 bilan shtammlar va atipik holatlarni aniqlashda doimiy ishlamoqda. Bu yil reanimatsiya bolalarga to‘la. O‘tgan yili bunday holat bo‘lmagan, hozir go‘daklar, yosh bolalar reanimatsiyada yotibdi. Shuni his qilishimiz kerakki, siz kimgadir vaksina olmagin, uning nojo‘ya ta’sirlari ko‘p va hokazo, desangiz, u ertaga borib qari odamlarga yoki bolalarga yuqtirsa, bu bilan vaksina qildira olmaydigan aholiga zarar yetkazyapmiz”, – dedi mutaxassis.

Koronavirusga qarshi kurash shtabi a’zosi Nurmat Otabekov hamkasbi fikriga qo‘shilgan holda, odamlar ikkilanib turgan paytda ayro fikrlarning taqdim etilishi ularning sog‘lig‘iga yomon ta’sir qilishi mumkinligini ta’kidlab o‘tdi.

“Har birimiz bildirgan fikrimizga asos sifatida ko‘rsatadigan omillarimiz bo‘lishi kerak. Odamlar ikkilanib, olsammikan, olmasammikan, deb turgan paytda ayro fikrlarning taqdim etilishi emlanmaslikka sabab bo‘lishi mumkin. Oqibatda bu odam kasallikka chalinsa, hayotdan ko‘z yumsa, ularning uvolini kim bo‘yniga oladi? Mana shu masalani yoddan chiqarmasligimiz kerak”, — dedi Koronavirusga qarshi kurash shtabi a’zosi.

Avvalroq Asab va ruhiyat ilmiy-tibbiy markazi direktori, professor Zarifboy Ibodullayevning O‘zbekistonda amalga oshirilayotgan ommaviy vaksinatsiya jarayonlarida qo‘llanilayotgan O‘zbekiston—Xitoy hammuallifligida yaratilgan ZF-UZ-VAC 2001 vaksinasining yaratilish bosqichlari haqida ma’lumotlar yo‘qligini aytib, ushbu vaksina qo‘llanilishining maqsadga muvofiqligini shubha ostiga olgan savollari bilan ijtimoiy tarmoqlarda videomurojaati tarqalgan edi.

Bunga javoban Innovatsion rivojlanish vazirligi bayonot bergan. Unda Ibodullayevning e’tirozlari noo‘rin va haqiqatga umuman to‘g‘ri kelmasligi, u tomonidan tarqatilgan videomateriallar O‘zbekistonda amalga oshirilayotgan ommaviy vaksinatsiya jarayonlarida aholini chalg‘itishga xizmat qilayotgani aytilgan. “Professor Ibodullayev ilmiy jurnallardagi ma’lumotlarni o‘rganmay, mazkur vaksina haqida hech qayerda ma’lumotlar berilmagan, deb xalqimizning ko‘ngliga g‘ulg‘ula solmoqda”, — deyilgan vazirlik bayonotida.