Tashqi mehnat migratsiyasi agentligi Rossiyaning Tolyatti shahrida joylashgan xostelda o‘zbekistonlik mehnat migrantlari bilan yuz bergan holat yuzasidan rasmiy bayonot berdi.
20-iyulga o‘tar kechasi Tolyattidagi xostelda yashovchi 23 nafar xorij fuqarosida ommaviy kasallanish kuzatilgani, natijada ularning 13 nafari zaharlanish belgilari bilan shifoxonaga yotqizilgani to‘g‘risida xabar berilgandi.
Ma’lum qilinishicha, Tashqi mehnat migratsiyasi agentligining Rossiyadagi vakolatxonasi O‘zbekistonning Qozon shahridagi Bosh konsulxonasi bilan hamkorlikda ushbu holatni o‘rgangan.
Aniqlanishicha, Tolyattidagi xostelda vaqtincha yashovchi mehnat migrantlari o‘rtasida ommaviy kasallanish oqibatida 13 nafar chet el fuqarosi 5-shahar shifoxonasiga yotqizilgan. Shifoxonada davolanayotgan ushbu fuqarolarning 9 nafari O‘zbekiston fuqarosi hisoblanadi. Bemorlarning barchasiga “noma’lum bakterial ichak infeksiyasi” tashxisi qo‘yilgan va ularning holati qoniqarli.
Shuningdek, bemorlarning bir nafarida koronavirus infeksiyasi aniqlangani sababli 1-shifoxonaga o‘tkazilgan.
Shu bilan birga, Tashqi mehnat migratsiyasi agentligi ushbu fuqarolarga yuridik va tibbiy yordam ko‘rsatilishiga tayyorligini ma’lum qilgan.
Eslatib o‘tamiz, 2019-yilning iyulida Rossiyaning Samara viloyatida 46 nafar o‘zbekistonlik zaharlangan edi.
Izoh (0)