Вакцина ҳақидаги миш-мишлар эмлана олмайдиган аҳоли қатламига зарар етказиши мумкин. Бу ҳақда 23 июль куни АОКАда бўлиб ўтган матбуот анжуманида Инновацион ривожланиш вазирлиги ҳузуридаги Илғор технологиялар маркази биотехнологиялар лабораторияси мудири Дилбар Далимова айтиб ўтди, дея хабар бермоқда «Дарё» мухбири.
Дилбар Далимованинг таъкидлашича, ҳозирги касаллик, оғир ҳолатлар кўпаяётган бир вазиятда врачлар маълумот беришдан аввал мавзуни чуқур ўрганишлари керак.
«Агар қанақадир маълумотлар бўлмаса, сўранглар, биз очиқмиз, барча маълумотлар бор бизда. Лекин бундай қилмаган ҳолда, ОАВларда чиқиб вакцина ҳақида билмасдан ҳар хил гапириб, бу вакцина ўлимга олиб келаркан, деган ва ҳоказо гапларни тарқатманглар», – деди марказ масъул ходими.
Далимованинг алоҳида қайд этишича, тиббиёт ходимлари ва олимлар тарқатаётган маълумотлар аҳолига қаттиқ таъсир қилмоқда, натижада касалликлар кўпайиб, ҳатто болалар орасида оғир ҳолатлар кузатилмоқда.
«Марказ Зангота-1 ва Зангота-2 билан штаммлар ва атипик ҳолатларни аниқлашда доимий ишламоқда. Бу йил реанимация болаларга тўла. Ўтган йили бундай ҳолат бўлмаган, ҳозир гўдаклар, ёш болалар реанимацияда ётибди. Шуни ҳис қилишимиз керакки, сиз кимгадир вакцина олмагин, унинг ножўя таъсирлари кўп ва ҳоказо, десангиз, у эртага бориб қари одамларга ёки болаларга юқтирса, бу билан вакцина қилдира олмайдиган аҳолига зарар етказяпмиз», – деди мутахассис.
Коронавирусга қарши кураш штаби аъзоси Нурмат Отабеков ҳамкасби фикрига қўшилган ҳолда, одамлар иккиланиб турган пайтда айро фикрларнинг тақдим этилиши уларнинг соғлиғига ёмон таъсир қилиши мумкинлигини таъкидлаб ўтди.
«Ҳар биримиз билдирган фикримизга асос сифатида кўрсатадиган омилларимиз бўлиши керак. Одамлар иккиланиб, олсаммикан, олмасаммикан, деб турган пайтда айро фикрларнинг тақдим этилиши эмланмасликка сабаб бўлиши мумкин. Оқибатда бу одам касалликка чалинса, ҳаётдан кўз юмса, уларнинг уволини ким бўйнига олади? Мана шу масалани ёддан чиқармаслигимиз керак», — деди Коронавирусга қарши кураш штаби аъзоси.
Аввалроқ Асаб ва руҳият илмий-тиббий маркази директори, профессор Зарифбой Ибодуллаевнинг Ўзбекистонда амалга оширилаётган оммавий вакцинация жараёнларида қўлланилаётган Ўзбекистон—Хитой ҳаммуаллифлигида яратилган ZF-UZ-VAC 2001 вакцинасининг яратилиш босқичлари ҳақида маълумотлар йўқлигини айтиб, ушбу вакцина қўлланилишининг мақсадга мувофиқлигини шубҳа остига олган саволлари билан ижтимоий тармоқларда видеомурожаати тарқалган эди.
Бунга жавобан Инновацион ривожланиш вазирлиги баёнот берган. Унда Ибодуллаевнинг эътирозлари ноўрин ва ҳақиқатга умуман тўғри келмаслиги, у томонидан тарқатилган видеоматериаллар Ўзбекистонда амалга оширилаётган оммавий вакцинация жараёнларида аҳолини чалғитишга хизмат қилаётгани айтилган. «Профессор Ибодуллаев илмий журналлардаги маълумотларни ўрганмай, мазкур вакцина ҳақида ҳеч қаерда маълумотлар берилмаган, деб халқимизнинг кўнглига ғулғула солмоқда», — дейилган вазирлик баёнотида.
Эслатиб ўтамиз, мажбурий эмланишдан асоссиз бош тортган 14 тоифадаги ходимларга қандай жазо қўлланиши кўриб чиқилаётгани ҳақида хабар берилган эди. Ўзбекистонда 6 миллиондан ортиқ киши вакцина қабул қилгани, режа — 21 миллион нафар эканлиги, шунингдек, ходимларини тўлиқ эмлаган кафе-ресторанларнинг соат 20:00 дан кейин ҳам ишлашига рухсат берилиши мумкинлиги ҳақида хабар берилган, шунингдек, Ўзбекистон бўйлаб очилган эмлаш пунктлари рўйхати эълон қилинган эди.Эслатиб ўтамиз, 23 июль куни Шавкат Мирзиёев аҳоли мурожаатлари билан ишлаш тизимини янгича ташкил қилиш чора-тадбирлари бўйича видеоселектор йиғилишида халққа мурожаат қилиб, коронавирус пандемиясидан огоҳ бўлишга чақирди.
Изоҳ (0)