Adliya vazirligi jamoatchilik bilan aloqalar bo‘limi boshlig‘i Sevara O‘rinboyeva ijtimoiy tarmoqlarda koronavirus infeksiyasi keng tarqalayotgani sabab hududlar yana yopilishi borasida tarqalgan xabarlarga javob berdi, deb yozadi O‘zA.
Ijtimoiy tarmoqlarda Toshkent shahrida 2 hafta davomida kechki soat 20:00 dan ertalab soat 08:00 gacha ko‘chada yurish taqiqlanishi mumkinligi to‘g‘risida turli asossiz xabarlar tarqalmoqda. Mazkur xabar yolg‘on va haqiqatga mos kelmaydi.Shuningdek, Sevara O‘rinboyeva karantin choralari kuchaytirilishi bilan ba’zi dorixonalarda narxlar sezilarli oshgani to‘g‘risida savolga javob berib, bu kabi holat savdo yoki xizmat ko‘rsatish qoidalarini buzish hisoblanishini ta’kidlagan.Eslatib o‘tamiz, aholi o‘rtasida yolg‘on axborot tarqatganlik uchun javobgarlik mavjud. Yolg‘on xabarlar tarqalishining oldini olish va uni tarqatgan shaxslarni javobgarlikka tortish maqsadida qonun bilan javobgarlik belgilangan.
Ma’muriy javobgarlik to‘g‘risidagi kodeksga ko‘ra, jamoat tartibiga yoki xavfsizligiga tahdid soluvchi yolg‘on axborotni tarqatish, shu jumladan, OAV, telekommunikatsiya tarmoqlari yoki internetda tarqatish BHMning 50 baravaridan 100 baravarigacha (12,5 milliondan 24,5 million so‘mgacha) miqdorda jarima solishga sabab bo‘ladi.
Jinoyat kodeksiga muvofiq, ma’muriy jazo qo‘llanilganidan keyin ham ushbu xatti-harakatlar takror sodir etilsa, BHMning 200 baravarigacha miqdorda jarima yoki 300 soatgacha majburiy jamoat ishlari yoki 2 yilgacha axloq tuzatish ishlari yoki 2 yilgacha ozodlikni cheklash bilan jazolanadi.
Sevara O‘rinboyeva, Adliya vazirligi jamoatchilik bilan aloqalar bo‘limi boshlig‘i
Ta’kidlash kerakki, narxlarni asossiz keskin oshirish Ma’muriy javobgarlik to‘g‘risidagi kodeksning 164-moddasiga asosan fuqarolarga bazaviy hisoblash miqdorining bir baravaridan besh baravarigacha (1,225 million so‘mgacha), mansabdor shaxslarga esa — besh baravaridan yetti baravarigacha (1,715 million so‘mgacha) miqdorda jarima solishga sabab bo‘ladi.
Eslatib o‘tamiz, Prezident Shavkat Mirziyoyev 1-aprel kuni aholi salomatligini saqlash va koronavirusga qarshi kurashish borasida amalga oshirilayotgan ishlar hamda kelgusidagi ustuvor vazifalar muhokamasi yuzasidan o‘tkazilgan videoselektor yig‘ilishida hech qayer yopilmasligi, lekin tartib-intizomni kuchaytirilishini aytgan edi.
Ma’lumot uchun, O‘zbekistonda 28-iyundan karantin cheklovlari kuchaytirildi. Toshkent shahriga 28-iyundan transport vositalari kirishiga hamda ko‘ngilochar va ovqatlanish obyektlari faoliyatiga cheklovlar o‘rnatildi.
Izoh (0)