Sog‘liqni saqlash vazirligining taklifiga binoan Respublika maxsus komissiyasining qarorlari bilan koronavirus sabab joriy etilgan tartib va cheklovlarga qo‘shimchalar kiritildi.

Qayd etilishicha, 2021-yilning 28-iyunidan 12-iyuliga qadar Toshkent shahriga qo‘shni viloyatlardan avtotransport (avtobus, avtomobil) vositalari orqali o‘ta zarurat bo‘lmagan hollarda kirish bo‘yicha cheklovlar o‘rnatildi. Ushbu cheklov quyidagi holatlarga tatbiq etilmasligi belgilandi:

• Toshkent shahrida doimiy yashovchi (ro‘yxatdan o‘tgan) shaxslarga;
• Toshkent shahrida doimiy yashovchi (ro‘yxatdan o‘tgan) chet el fuqarolariga;
• davolanish uchun tashrif buyurayotgan shaxslarga;
• Toshkent shahrida doimiy faoliyat ko‘rsatuvchi hududlardan keluvchi shaxslarga (ish joyi to‘g‘risida tasdiqlovchi hujjat bo‘lgan taqdirda);
• Toshkent xalqaro aeroporti orqali xorijiy mamlakatga uchib ketuvchi shaxslarga (aviachipta bo‘lgan taqdirda);
• O‘zbekistonga turist bo‘lib kelgan chet el fuqarolariga va ularni olib kelayotgan avtotransport vositasining haydovchisi hamda, agar guruhli jamoa bo‘lsa, tarjimon yoki turistik firma vakiliga;
• barcha turdagi yuk tashish, shuningdek, qurilish materiallari (qum, shag‘al va boshqalar) bilan bog‘liq hollarga, yetishtirilgan qishloq xo‘jaligi mahsulotlarini har qanday avtotransport vositalarida hamda “O‘zbekiston pochtasi” AJning pochta jo‘natmalarini tashish bilan bog‘liq hollarga;
• sog‘liqni saqlash tizimi va sanitariya-epidemiologiya xizmati xodimlariga.

Mamlakatda kunlik kasallanish holatlari soni yana ortib bormoqda. 24-iyun kuni koronavirus infeksiyasini yuqtirib olish bilan bog‘liq 476 ta yangi holat ro‘yxatga olinib, kunlik kasallanishlar soni bo‘yicha 2021-yilgi yangi antirekordni o‘rnatdi. 23-iyunda 442 kishida 22-iyunda 419 kishida, 21-iyunda 395 kishida, 20-iyunda 427 kishida, 19-iyunda 415 kishida koronavirus tasdiqlangan.

Eslatib o‘tamiz, O‘zbekistonda 28-iyundan karantin cheklovlari kuchaytiriladi. Ko‘ngilochar va ovqatlanish obyektlari faoliyatiga cheklovlar o‘rnatiladi.