Qashqadaryo viloyat Favqulodda vaziyatlar boshqarmasining Shahrisabz tuman bo‘limi mas’ullari Ko‘lga olib boruvchi yo‘lning 10 soat yopilib qolganiga izoh berdi, deya xabar qildi “Daryo” muxbiri.
“Daryo” muxbiri bilan suhbatlashgan tuman Favqulodda vaziyatlar bo‘limi boshlig‘i Alimardon Qurbonov qishloqqa olib boruvchi yo‘lning ta’miri uchun 2,5 soat vaqt sarflanganini, yo‘lning 10 soat yopilgani yomg‘ir yog‘ishi bilan bog‘liqligini tushuntirdi.
“Aslida o‘tgan 10 soat fursatda yomg‘ir ham yog‘gan. Bunday paytda esa qishloqqa olib boruvchi yo‘l ochiq bo‘lsa-da, odamlar qatnovni to‘xtatdi. Boisi, kuchli yomg‘ir paytida tog‘dan tosh dumalashi yoki tuproq ko‘chish xavfi bor. Ammo yo‘l ta’miri uchun ikki yarim soat vaqt sarfladik”, — deydi Alimardon Qurbonov.
Tuman Favqulodda vaziyatlar bo‘limi boshlig‘ining qo‘shimcha ma’lumot berishicha, texnikalar yo‘l ta’miri uchun tuman Obodonlashtirish boshqarmasi hisobidan 700 litr yonilg‘i sarflagan.
“Yo‘l ta’mirida 50 nafarga yaqin hasharchi, 6 nafar tuman Favqulodda vaziyatlar bo‘limi xodimlari ishtirok etdi. Endilikda muammo yo‘q”, — deydi Alimardon Qurbonov.
Eslatib o‘tamiz, avvalroq Ko‘l qishlog‘iga sel kelib, qishloqqa olib kiruvchi yagona yo‘l 10 soatga yopilib qolgani xabar berilgandi.
Izoh (0)