Адлия вазирлиги жамоатчилик билан алоқалар бўлими бошлиғи Севара Ўринбоева ижтимоий тармоқларда коронавирус инфекцияси кенг тарқалаётгани сабаб ҳудудлар яна ёпилиши борасида тарқалган хабарларга жавоб берди, деб ёзади ЎзА.
Ижтимоий тармоқларда Тошкент шаҳрида 2 ҳафта давомида кечки соат 20:00 дан эрталаб соат 08:00 гача кўчада юриш тақиқланиши мумкинлиги тўғрисида турли асоссиз хабарлар тарқалмоқда. Мазкур хабар ёлғон ва ҳақиқатга мос келмайди.Шунингдек, Севара Ўринбоева карантин чоралари кучайтирилиши билан баъзи дорихоналарда нархлар сезиларли ошгани тўғрисида саволга жавоб бериб, бу каби ҳолат савдо ёки хизмат кўрсатиш қоидаларини бузиш ҳисобланишини таъкидлаган.Эслатиб ўтамиз, аҳоли ўртасида ёлғон ахборот тарқатганлик учун жавобгарлик мавжуд. Ёлғон хабарлар тарқалишининг олдини олиш ва уни тарқатган шахсларни жавобгарликка тортиш мақсадида қонун билан жавобгарлик белгиланган.
Маъмурий жавобгарлик тўғрисидаги кодексга кўра, жамоат тартибига ёки хавфсизлигига таҳдид солувчи ёлғон ахборотни тарқатиш, шу жумладан, ОАВ, телекоммуникация тармоқлари ёки интернетда тарқатиш БҲМнинг 50 бараваридан 100 бараваригача (12,5 миллиондан 24,5 миллион сўмгача) миқдорда жарима солишга сабаб бўлади.
Жиноят кодексига мувофиқ, маъмурий жазо қўлланилганидан кейин ҳам ушбу хатти-ҳаракатлар такрор содир этилса, БҲМнинг 200 бараваригача миқдорда жарима ёки 300 соатгача мажбурий жамоат ишлари ёки 2 йилгача ахлоқ тузатиш ишлари ёки 2 йилгача озодликни чеклаш билан жазоланади.
Севара Ўринбоева, Адлия вазирлиги жамоатчилик билан алоқалар бўлими бошлиғи
Таъкидлаш керакки, нархларни асоссиз кескин ошириш Маъмурий жавобгарлик тўғрисидаги кодекснинг 164-моддасига асосан фуқароларга базавий ҳисоблаш миқдорининг бир бараваридан беш бараваригача (1,225 миллион сўмгача), мансабдор шахсларга эса — беш бараваридан етти бараваригача (1,715 миллион сўмгача) миқдорда жарима солишга сабаб бўлади.
Эслатиб ўтамиз, Президент Шавкат Мирзиёев 1 апрель куни аҳоли саломатлигини сақлаш ва коронавирусга қарши курашиш борасида амалга оширилаётган ишлар ҳамда келгусидаги устувор вазифалар муҳокамаси юзасидан ўтказилган видеоселектор йиғилишида ҳеч қаер ёпилмаслиги, лекин тартиб-интизомни кучайтирилишини айтган эди.
Маълумот учун, Ўзбекистонда 28 июндан карантин чекловлари кучайтирилди. Тошкент шаҳрига 28 июндан транспорт воситалари киришига ҳамда кўнгилочар ва овқатланиш объектлари фаолиятига чекловлар ўрнатилди.
Изоҳ (0)