Qozog‘iston hukumati respublika aholisini koronavirusga qarshi emlanishga majburlamaydi, yirik mehnat jamoalari faoliyati bilan bog‘liq maxsus holatlar bundan mustasno. Bu haqda Qozog‘iston prezidenti Qosim-Jomart To‘qayev mamlakatdagi epidemiologik vaziyatga bag‘ishlangan yig‘ilishda aytib o‘tdi, deb yozadi “TASS”.
“Emlanishni istamaydigan odamlar bilan ishlashda turlicha yondashuvdan foydalanish lozim. Bunday kishilar guruhi bir xil emas. Emlashdan bosh tortish sabablari tubdan farq qiladi. Bunday odamlar orasida ikkilanadiganlar ko‘p”, — dedi u.
Prezidentning so‘zlariga ko‘ra, ularni har qanday usul bilan, shu jumladan, ijtimoiy tarmoqlar orqali ishontirish kerak.
“Ba’zi rivojlangan G‘arb mamlakatlarida ishontirish usullaridan majburlash choralariga o‘tilmoqda. Biz bunday yo‘l tutmaymiz, faqat yirik mehnat jamoalari faoliyati bilan bog‘liq maxsus holatlar bundan mustasno”, — dedi davlat rahbari.
Shuningdek, prezident ushbu sohadagi yetakchi ishlab chiqaruvchilar tomonidan vaksinalar turini kengaytirish muhimligini ta’kidladi. “Rossiyaning yangi ‘Sputnik Layt’ vaksinasini mahalliy farmatsevtika kompaniyalariga yetkazib berish va ishlab chiqarish masalasini ko‘rib chiqish kerak”, — dedi To‘qayev.
Qozog‘istonda aholini koronavirusga qarshi emlash 1-fevraldan Rossiyaning “Sputnik V” vaksinasi yordamida boshlangan. Fevral oxirida Qozog‘istonning Qarag‘anda farmatsevtika kompleksida ishlab chiqarilgan “Sputnik V” vaksinasini mamlakat hududlariga jo‘natish boshlandi.
26-aprel kuni respublikada aholini koronavirusiga qarshi QazVac mahalliy vaksinasi bilan emlash boshlandi. Aprel oyi oxirida “Samruk-Kazina” Milliy farovonlik jamg‘armasi Xitoyning Sinopharm kompaniyasidan 1 million doza Hayat-Vax vaksinasini sotib oldi. Bundan tashqari, iyun oyi boshlarida respublika Xitoyning Sinovac Biotech kompaniyasi tomonidan ishlab chiqarilgan CoronaVac vaksinasining 500 ming dozadagi birinchi partiyasini qabul qilib oldi.
15-iyul kuni Rossiya to‘g‘ridan-to‘g‘ri investitsiya fondi Qozog‘iston Sog‘liqni saqlash vazirligi koronavirusga qarshi “Sputnik Layt” bir komponentli vaksinani ro‘yxatdan o‘tkazgani haqida xabar berdi.
Eslatib o‘tamiz, Qozog‘istonning birinchi prezidenti Nursulton Nazarboyev va amaldagi prezidenti Qosim-Jo‘mart To‘qayev koronavirusga qarshi mamlakatda ishlab chiqarilgan “Sputnik V” vaksinasi bilan emlangan.
Avvalroq Qozog‘istonda ba’zi sohalar xodimlari uchun majburiy vaksinatsiya joriy etilgani, emlanishdan bosh tortgan xizmat ko‘rsatish sohasi xodimlari jarimaga tortilishi haqida xabar berilgandi.
Izoh (0)