Қозоғистон ҳукумати республика аҳолисини коронавирусга қарши эмланишга мажбурламайди, йирик меҳнат жамоалари фаолияти билан боғлиқ махсус ҳолатлар бундан мустасно. Бу ҳақда Қозоғистон президенти Қосим-Жомарт Тўқаев мамлакатдаги эпидемиологик вазиятга бағишланган йиғилишда айтиб ўтди, деб ёзади «ТАСС».
«Эмланишни истамайдиган одамлар билан ишлашда турлича ёндашувдан фойдаланиш лозим. Бундай кишилар гуруҳи бир хил эмас. Эмлашдан бош тортиш сабаблари тубдан фарқ қилади. Бундай одамлар орасида иккиланадиганлар кўп», — деди у.
Президентнинг сўзларига кўра, уларни ҳар қандай усул билан, шу жумладан, ижтимоий тармоқлар орқали ишонтириш керак.
«Баъзи ривожланган Ғарб мамлакатларида ишонтириш усулларидан мажбурлаш чораларига ўтилмоқда. Биз бундай йўл тутмаймиз, фақат йирик меҳнат жамоалари фаолияти билан боғлиқ махсус ҳолатлар бундан мустасно», — деди давлат раҳбари.
Шунингдек, президент ушбу соҳадаги етакчи ишлаб чиқарувчилар томонидан вакциналар турини кенгайтириш муҳимлигини таъкидлади. «Россиянинг янги ‘Спутник Лайт’ вакцинасини маҳаллий фармацевтика компанияларига етказиб бериш ва ишлаб чиқариш масаласини кўриб чиқиш керак», — деди Тўқаев.
Қозоғистонда аҳолини коронавирусга қарши эмлаш 1 февралдан Россиянинг «Спутник V» вакцинаси ёрдамида бошланган. Февраль охирида Қозоғистоннинг Қарағанда фармацевтика комплексида ишлаб чиқарилган «Спутник V» вакцинасини мамлакат ҳудудларига жўнатиш бошланди.
26 апрель куни республикада аҳолини коронавирусига қарши QazVac маҳаллий вакцинаси билан эмлаш бошланди. Апрель ойи охирида «Самрук-Казина» Миллий фаровонлик жамғармаси Хитойнинг Sinopharm компаниясидан 1 миллион доза Hayat-Vax вакцинасини сотиб олди. Бундан ташқари, июнь ойи бошларида республика Хитойнинг Sinovac Biotech компанияси томонидан ишлаб чиқарилган CoronaVac вакцинасининг 500 минг дозадаги биринчи партиясини қабул қилиб олди.
15 июль куни Россия тўғридан-тўғри инвестиция фонди Қозоғистон Соғлиқни сақлаш вазирлиги коронавирусга қарши «Спутник Лайт» бир компонентли вакцинани рўйхатдан ўтказгани ҳақида хабар берди.
Эслатиб ўтамиз, Қозоғистоннинг биринчи президенти Нурсултон Назарбоев ва амалдаги президенти Қосим-Жўмарт Тўқаев коронавирусга қарши мамлакатда ишлаб чиқарилган «Спутник V» вакцинаси билан эмланган.
Аввалроқ Қозоғистонда баъзи соҳалар ходимлари учун мажбурий вакцинация жорий этилгани, эмланишдан бош тортган хизмат кўрсатиш соҳаси ходимлари жаримага тортилиши ҳақида хабар берилганди.
Изоҳ (0)