Shimoliy Koreya davlat ommaviy axborot vositalari mamlakat yoshlarini Janubiy Koreyada so‘zlashiladigan jargonlardan foydalanmaslikka chaqirdi.
Shuningdek, KXDR rasmiy gazetasida Janubiy Koreya musiqasi, soch turmagi va modasini qabul qilishga qarshi yangi ogohlantirishlar paydo bo‘ldi.
OAVning ta’kidlashicha, bunday chaqiriqlar yangi qonunning bir qismi bo‘lib, uning maqsadi KXDRga har qanday xorijiy ta’sirlarni yo‘q qilish. Qonunning buzilishi og‘ir sanksiyalar, qamoq yoki hatto o‘lim jazosiga sabab bo‘ladi.
“Rang-barang burjuaziya belgisi ostida mafkuraviy va madaniy kirib borish qurol ko‘targan dushmanlardan xavfliroq”, — deyiladi “Nodon sinmun” davlat gazetasida.
Gazeta, shuningdek, “Pxenyan dialektiga asoslangan koreys tili Janubiy Koreyanikidan yaxshiroq”, deb ta’kidlagan, shuning uchun yoshlar Shimoliy Koreyaning standart tilida gaplashishga da’vat etilgan.
Ta’kidlanishicha, xorijiy ta’sir Shimoliy Koreya kommunistik rejimiga hamda oliy rahbar Kim Chen Inning hokimiyatiga tahdid sifatida ko‘rilmoqda.
Avvalroq Kim Chen In Janubiy Koreya musiqa va filmlariga qarshi urush e’lon qilgani haqida xabar berilgandi. Unga ko‘ra, mamlakatda Janubiy Koreya filmlarini tomosha qilgan va musiqalarini tinglaganlar uchun jazo kuchaytiriladigan bo‘ldi.
Janubiy Koreyaning Ikki Koreya davlatini birlashtirish vazirligi esa KXDRni Koreyalararo aloqa liniyalarini zudlik bilan tiklashga chaqirgandi.
Izoh (0)