Xorazmda ona uchun ajratilgan uyning eshik qismini mixlab tashlagan o‘g‘ilga nisbatan surishtiruv ishlari olib borilmoqda

Xorazm viloyati IIB ijtimoiy tarmoqlarda tarqalgan Bog‘ot tumani IIB xodimlari va fuqaro M.B. o‘rtasidagi ziddiyatli holat aks etgan videolavhani o‘rganib chiqdi.

O‘rganish davomida aniqlanishicha, tumanning “Yangi qadam” mahallasida yashovchi M.B. onasining (S.B. ismli fuqaro) nomida bo‘lgan uyni alohida yashash uchun bir qismini ajratib olish masalasida ancha vaqtdan buyon o‘zaro nizolashib kelgan. Bugungi kunda holat yuzasidan sudning hal qiluv qarori qabul qilinib, onasi va o‘ziga uyning qaysi qismi tegishli ekani qat’iy belgilab berilgan.

Shunday bo‘lsa-da, M.B. onasiga uyning ajratib berilgan qismiga erkin kirib-chiqishi va yashashi uchun imkoniyat bermasdan, uy eshigini o‘zboshimchalik bilan mixlab tashlagan hamda shu jarayonlarda kelib chiqqan nizolar vaqtida bir necha marotaba onasini urib, tan jarohati yetkazgan. Onaning huquqni muhofaza qilish organlariga qilgan murojaati asosida o‘g‘li M.B. bir necha marta Ma’muriy javobgarlik to‘g‘risidagi kodeksining qator moddalari bilan javobgarlikka tortilgan. Fuqaro M.B. bilan Bog‘ot tumani IIB mas’ul xodimlari, xususan, tuman IIB boshlig‘i tomonidan bir necha bor yakka tartibda profilaktik suhbat o‘tkazilgan bo‘lishiga qaramasdan, u o‘zining qonunga xilof xatti-harakatlarini davom ettirib, o‘z onasiga uyga kirib-chiqishi va yashashiga asossiz ravishda to‘sqinlik qilib kelgan.

Videolavhada aks etgan holatda fuqaro S.B. uyning o‘ziga tegishli qismiga kirib-chiqishiga o‘g‘li M.B. to‘sqinlik qilayotgani, o‘zining haq-huquqlarini tiklab va himoya qilib berish masalasida 6-iyul kuni Bog‘ot tumani IIBga yordam so‘rab murojaat qilgan. Murojaat bo‘yicha 8-iyul kuni Bog‘ot tumani IIB boshlig‘i va bir guruh mas’ul xodimlari mazkur xonadonga borganida, M.B. haqiqatan ham onasi S.B. uyga kirib-chiqishi lozim bo‘lgan eshikni o‘zboshimchalik bilan, sud qaroriga zid ravishda mixlash yo‘li bilan mahkamlab tashlagani aniqlangan.

Shundan keyin fuqaro S.B.ning xohishi va so‘roviga ko‘ra, ushbu eshik ochib berilgan. M.B. esa ushbu eshik qayta yopishga va o‘z onasining ushbu xonadonga kirib-chiqmasligiga uzil-kesil erishish maqsadida tuman IIB xodimlariga namoyishkorona qarshilik ko‘rsatgan.

Hozirgi kunda fuqaro M.B.ning yuqoridagi xatti-harakatlari yuzasidan surishtiruv ishlari olib borilmoqda.

“Mazkur jarayonda tuman IIB xodimlari tomonidan fuqaro M.B. yoki uning yaqinlariga nisbatan jismoniy kuch ishlatish yoki biron-bir tarzda ruhiy bosim o‘tkazish xolatlariga yo‘l qo‘yilmagan”, — deyiladi munosabatda.

Avvalroq Surxondaryoda muqaddam 7 marotaba sudlangan erkak IIB xodimlaridan norozi bo‘lib lezviya bilan tanasiga jarohat yetkazgani, Toshkentda 73 yoshli erkakka kuch ishlatgan PPX xodimlariga sud hukmi o‘qilgani to‘g‘risida xabar berilgandi.