Namanganda Kosonsoy sohillarida joylashgan dam olish maskanlarining holati o‘rganilmoqda. Bu haqda “Daryo” muxbiri Azizbek Abduvaliyev xabar bermoqda.
O‘rganish ishlarini viloyat qurilish bosh boshqarmasi va viloyat qurilish sohasida nazorat hududiy nazorat inspeksiyasi mutaxassislari amalga oshirmoqda. Ularga FVB xodimlari yaqindan yordam bermoqda.
Viloyat qurilish bosh boshqarmasi boshlig‘i Dilshodbek Niyazovning aytishicha, o‘rganishlar 15-iyul kuni boshlangan, hozirda ham davom etmoqda. Bir kunning o‘zida 50 dan ortiq hordiq maskanlari ko‘zdan kechirilgan. Aksariyat soy sohilidagi taqiqlangan joylarga hech qanday ruxsatsiz bunday maskanlar tiklangani aniqlangan.
Ularning egalariga Kosonsoy tuman hokimligi huzurida tuzilgan ishchi guruh tomonidan ogohlantirish xatlari berildi.
Hozirgacha Kosonsoy sohillarida noqonuniy qurilgan bino va qurilmalardan 100 ga yaqini buzdirildi. 50 dan ortiq ko‘chma qurilmalar, ya’ni so‘ri va o‘rindiqlar oldirib tashlandi.
Kosonsoydagi dam olish maskanlari faoliyatini tartibga solish yuzasidan ishlar davom ettirilmoqda. Mutasaddilarga ko‘ra, bunday tadbirlar kelgusida katta talafot va xavf-xatarlarning oldini olishda yordam beradi.
Eslatib o‘tamiz, Kosonsoy tumanida 2021-yil 13-iyul kuni yuz bergan sel yopirilishi qurbonlari soni 9 kishiga yetdi. Ularning barchasi Namangan shahridan Kosonsoy sohillariga dam olish uchun chiqqan fuqarolar bo‘lgan.
Mavzuga doir:
Izoh (0)