“Xodimning ish joyiga kirishga uringan”. Toshkent shahar IIBB fuqarolarga zo‘ravonlik qilingani aytilgan videoga munosabat bildirdi

Toshkent shahar IIBB ijtimoiy tarmoqlarda tarqalgan “Farhod” bozorida IIB xodimining fuqarolarga zo‘ravonlik qilayotgani aks etgan video yuzasidan ma’lumot berdi.

Ma’lum qilinishicha, Uchtepa tumani IIO FMB 7-son ichki ishlar bo‘limiga poytaxtda yashovchi fuqaro Ch.T.dan murojaat kelib tushgan. Murojaatchi o‘z arizasida 41 yoshli T. X.ning undan 6 million so‘m qarzi borligini bildirgan.

2021-yil 5-iyun kuni Uchtepa tumani IIO FMB profilaktika katta inspektori podpolkovnik M. Fozilov Turg‘unpo‘lat X.ni ichki ishlar bo‘limiga kelib tushgan murojaat bilan tanishib, mazkur fakt bo‘yicha tushuntirish xati yozishi uchun taklif qilgan.

Xodimning ish joyiga Turg‘unpo‘lat bilan birga uning mazkur ishga aloqador bo‘lmagan ikki nafar tanishi (muqaddam ikki marta sudlangan 43 yoshli Farhod Yu. va 34 yoshli Solijon T.) ham kirishga uringan.

Xonani tark etish to‘g‘risidagi iltimosga javoban fuqarolar qo‘pol muomalada bo‘lib, holatni videoga tushirishni boshlagan va bu bilan xodimning ish faoliyatiga to‘sqinlik qilgan. Fuqarolar ichki ishlar bo‘limidan chiqarilishi jarayoni yuqoridagi videoga tushib qolgan. Kelishmovchilik davomida Turg‘unpo‘lat X. tushuntirish xati yozishga tayyorligini bildirib, o‘zi ham do‘stlarini tinchlantirmoqchi bo‘lgan.