Хоразмда она учун ажратилган уйнинг эшик қисмини михлаб ташлаган ўғилга нисбатан суриштирув ишлари олиб борилмоқда

Хоразм вилояти ИИБ ижтимоий тармоқларда тарқалган Боғот тумани ИИБ ходимлари ва фуқаро М.Б. ўртасидаги зиддиятли ҳолат акс этган видеолавҳани ўрганиб чиқди.

Ўрганиш давомида аниқланишича, туманнинг «Янги қадам» маҳалласида яшовчи М.Б. онасининг (С.Б. исмли фуқаро) номида бўлган уйни алоҳида яшаш учун бир қисмини ажратиб олиш масаласида анча вақтдан буён ўзаро низолашиб келган. Бугунги кунда ҳолат юзасидан суднинг ҳал қилув қарори қабул қилиниб, онаси ва ўзига уйнинг қайси қисми тегишли экани қатъий белгилаб берилган.

Шундай бўлса-да, М.Б. онасига уйнинг ажратиб берилган қисмига эркин кириб-чиқиши ва яшаши учун имконият бермасдан, уй эшигини ўзбошимчалик билан михлаб ташлаган ҳамда шу жараёнларда келиб чиққан низолар вақтида бир неча маротаба онасини уриб, тан жароҳати етказган. Онанинг ҳуқуқни муҳофаза қилиш органларига қилган мурожаати асосида ўғли М.Б. бир неча марта Маъмурий жавобгарлик тўғрисидаги кодексининг қатор моддалари билан жавобгарликка тортилган. Фуқаро М.Б. билан Боғот тумани ИИБ масъул ходимлари, хусусан, туман ИИБ бошлиғи томонидан бир неча бор якка тартибда профилактик суҳбат ўтказилган бўлишига қарамасдан, у ўзининг қонунга хилоф хатти-ҳаракатларини давом эттириб, ўз онасига уйга кириб-чиқиши ва яшашига асоссиз равишда тўсқинлик қилиб келган.

Видеолавҳада акс этган ҳолатда фуқаро С.Б. уйнинг ўзига тегишли қисмига кириб-чиқишига ўғли М.Б. тўсқинлик қилаётгани, ўзининг ҳақ-ҳуқуқларини тиклаб ва ҳимоя қилиб бериш масаласида 6 июль куни Боғот тумани ИИБга ёрдам сўраб мурожаат қилган. Мурожаат бўйича 8 июль куни Боғот тумани ИИБ бошлиғи ва бир гуруҳ масъул ходимлари мазкур хонадонга борганида, М.Б. ҳақиқатан ҳам онаси С.Б. уйга кириб-чиқиши лозим бўлган эшикни ўзбошимчалик билан, суд қарорига зид равишда михлаш йўли билан маҳкамлаб ташлагани аниқланган.

Шундан кейин фуқаро С.Б.нинг хоҳиши ва сўровига кўра, ушбу эшик очиб берилган. М.Б. эса ушбу эшик қайта ёпишга ва ўз онасининг ушбу хонадонга кириб-чиқмаслигига узил-кесил эришиш мақсадида туман ИИБ ходимларига намойишкорона қаршилик кўрсатган.

Ҳозирги кунда фуқаро М.Б.нинг юқоридаги хатти-ҳаракатлари юзасидан суриштирув ишлари олиб борилмоқда.

«Мазкур жараёнда туман ИИБ ходимлари томонидан фуқаро М.Б. ёки унинг яқинларига нисбатан жисмоний куч ишлатиш ёки бирон-бир тарзда руҳий босим ўтказиш холатларига йўл қўйилмаган», — дейилади муносабатда.

Аввалроқ Сурхондарёда муқаддам 7 маротаба судланган эркак ИИБ ходимларидан норози бўлиб лезвия билан танасига жароҳат етказгани, Тошкентда 73 ёшли эркакка куч ишлатган ППХ ходимларига суд ҳукми ўқилгани тўғрисида хабар берилганди.