Har transfer oynasi ochilganda Garet Beyl qaysi jamoaga o‘tishi muhokamasi boshlanadi. To‘rt karra Chempionlar Ligasi sohibi qachonlardir eng qimmat futbolchi maqomiga ega bo‘lgan. Bugun uning faoliyatidagi eng qiziq voqealar taqdim etiladi.
10. Beylga teggan “la’nat”
“Bugun ‘Tottenhem’ g‘alaba qozondimi? Yo‘q? Demak, Beyl yana maydonga tushibdi” — o‘n yil avval mana shu ibora mashhur bo‘lgandi. Hozir esa hech kim o‘sha paytdagi tavqi la’natni eslamaydi. Beylning “Uart Hart Leyn”dagi faoliyati og‘ir boshlangan. U jamoa bilan Premyer Ligada ketma-ket 24 ta o‘yinda g‘alaba qozona olmagan. Bu omadsiz natijani “Fulhem” bilan o‘yinda to‘xtatishi mumkin edi, Beyl hisobni 3:1 ko‘rinishiga olib kelgandi, ammo yakunda “shporlar” g‘alabani qo‘ldan chiqardi. 2007-yil sentabr oyidan 2009-yil sentabriga qadar Beyl chempionatda g‘alaba ta’mini tatib ko‘rmadi. Harri Rednapp uni “Byornli”ga qarshi o‘yin 5:0 bo‘lib turgan vaqtda besh daqiqaga maydonga tushirdi. Bu yerda “la’nat” kuchsiz edi.
9. Terma jamoa va klubda 16 yoshida debyut
2006-yilning 17-aprelida Beyl “Sauthempton” safida “Milluoll”ga qarshi o‘yinda (2:0) debyut qildi. O‘shanda Garet 16 yosh-u 275 kunlik bo‘lgan. O‘sha yilning may oyida 16 yosh-u 315 kunlik Beyl Uels safida Trinidad va Tobago terma jamoasiga qarshi o‘rtoqlik o‘yinida maydonga tushdi. Beylni Rayan Giggz darajasidagi yulduz sifatida ko‘ra boshlashdi. “Sauthempton”da moliyaviy muammolar bor edi, shuning uchun Beyl u yerda ko‘p vaqt qolmadi. 2007-yilda “Tottenhem” futbolchini 5 million funtga xarid qildi.
8. Uels. Golf. Madrid
“Beyl — muhim inson, deb hisoblayman. U biroz g‘alati yigitcha bo‘lib ko‘rinadi. U birinchi o‘rinda Uelsni o‘ylaydi, keyin golf, undan so‘ng “Real” haqida bosh qotiradi”, — degandi “Real”ning sobiq futbolchisi Predrag Miyatovich. Beyl Madrid jamoasi muxlislari bilan hech qachon iliq munosabatda bo‘lmagan. Muxlislar doim uni tanqid qilgan, masalan, klubda o‘yin o‘tkazmasdan 7 oyni jarohat tufayli o‘tkazib yuborib, Yevro—2020 saralash bosqichida Vengriyaga qarshi o‘yinga tayyor bo‘lgani uchun. Uels muxlislari esa terma jamoa yetakchisini qo‘llab-quvvatlardi. Ular bannerlarga “Uels. Golf. Madrid” degan yozuvni yozgandi.
7. Individual sovrinlar jamg‘armasi
2011-yil Beyl Angliyada professional futbolchilar ovoziga ko‘ra yilning eng yaxshi futbolchisi nomiga sazovor bo‘ldi. Oradan 2 yil o‘tib Garet APLning eng nufuzli 3 ta individual sovrinini qo‘lga kiritdi. U yana futbolchilar ovoziga ko‘ra eng yaxshi futbolchi nomiga sazovor bo‘ldi, yana yilning eng yaxshi yosh futbolchisi va sport jurnalistlari ovoziga ko‘ra eng yaxshi o‘yinchi bo‘ldi. Undan oldin faqatgina Krishtianu Ronaldu sovrinlar bo‘yicha het-trikni qayd etgan.
6. Dunyoning eng qimmat futbolchisi
Beylning qoyilmaqom o‘yinlari va “shporlar”ning Chempionlar Ligasi final bosqichiga chiqa olmayotgani Garetga katta jamoalarning qiziqishini oshirib yubordi. Eng yaxshi taklifni “Manchester Yunayted” berdi, lekin Beylning o‘zi “Real”ga o‘tishni orzu qilardi. 2013-yilda bu orzu amalga oshdi. Beyl 85 million funt sterling evaziga “Real” safiga o‘tdi.
5. Beylning Chempionlar Ligasidagi hikoyasi
Beyl “Real”dagi ilk mavsumidayoq Chempionlar Ligasi sovrinini qo‘lga kiritdi. Finalda “Atletiko” darvozasiga (4:1) muhim golni urdi. Oradan 2 yil o‘tib finalda yana “Atletiko” bilan to‘qnash keldi va golli uzatmani amalga oshirdi. 2017-yil “Yuventus”ga qarshi o‘yindagi finalda ham yaxshi o‘yin namoyish etdi. 2018-yilgi final haqida esa quyiroqda hikoya qilamiz.
4. Yevro—2016 dagi porlash
Beyl xalqaro musobaqalarga chiqa olmagan Jorj Best va Rayan Giggz kabi yulduzlar qatoriga kirishiga oz qolgandi. Lekin Yevro—2016 ga yo‘llanma 58 yillik kutishga chek qo‘ydi. Uels xalqaro musobaqada ishtirok etadigan bo‘ldi. Garet Beyl uchun Yevro ajoyib o‘tdi. 3 ta gol urdi, ulardan biri prinsipial raqib — Angliya darvozasiga urilgani alohida ahamiyatga ega.
3. Ispaniya Kubogidagi mo‘jizaviy gol
Muxlislar qalbiga qanday yo‘l topish mumkin? Yo‘li oson: Kubok finalida ashaddiy raqibga qarshi qoyilmaqom gol urish orqali. Beyl ijrosidagi ajoyib gol “Real”ning “Barselona” ustidan g‘alaba qozonib, Ispaniya Kubogini qo‘lga kiritishiga yordam berdi. Uelslik futbolchi o‘sha golni faoliyatidagi eng muhim gol deb hisoblaydi.
2. Maykon uchun “Taksi”
2010-yilda Maykon dunyoning eng yaxshi qanot himoyachilaridan biri edi. “Tottenhem” esa Chempionlar Ligasida ishtirok etish baxtiga muyassar bo‘lgandi. Beylning “Inter”ga qarshi o‘yini haligacha muxlislarning yodidan chiqmagan. Birinchi bo‘limda “Tottenhem” 0:4 hisobida mag‘lub bo‘layotgandi, ammo ikkinchi bo‘limda Beyl Maykonning qanotidan hujumlar uyushtirib 3 ta gol urdi. Maykon o‘sha o‘yinda endigina futbol o‘ynashni boshlagan yosh futbolchiga o‘xshab qolgandi. Javob o‘yinida “Tottenhem” “neradzurrilar” ustidan 3:1 hisobida g‘alaba qozondi. Beyl milanliklarning ustidan kulgandek 2 ta golli uzatmani amalga oshirdi.
1. Chempionlar Ligasidagi unutilmas gollardan biri
2018-yilgi Chempionlar Ligasi finalida Beyl maydonga tushganidan uch daqiqa o‘tib YChL tarixidagi eng chiroyli gollardan birini urdi. Akrobatik usulda urilgan goldan so‘ng “Real” hisobda oldinga chiqib oldi. O‘yin oxirlab borayotganda Beyl “Liverpul” darvozasiga ikkinchi golini ham urdi va 3:1 hisobida madridliklar g‘alabasini ta’minladi.
Izoh (0)