Yaqinda El Confidencial gazetasi Florentino Peresning futbolchilar va murabbiylar haqidagi haqoratomuz gaplari yozib olingan audioyozuvlarni e’lon qildi.
Portugallar yoqmaydi: Ronaldu va Mourinyo aqldan ozgan, agent Mendesh — nolga teng
Peres portugaliyalik futbolchi va murabbiy haqida g‘alati gaplar gapirdi:“Ronaldu — aqldan ozgan. U ahmoq, kasal odam. Siz uni sog‘lom deb o‘ylaysiz, lekin u sog‘lom emas, yo‘qsa hozirgi ishlarini qilmasdi.
Oxirgi qilgan ahmoqligini butun dunyo ko‘rdi. Nima deb o‘ylaysiz, nega u bunday ahmoqlik qilmoqda?”
Krishtianu 2012-yil “Granada”ga qarshi o‘yinda urgan gollarini nishonlamaydi. Uchrashuvdan so‘ng futbolchi Madrid jamoasida baxtsizligi va nega o‘zini bunday his qilayotganini “Real” rahbariyati yaxshi bilishini aytgandi. Florentino aynan shu “ahmoqlik” haqida gapirgandi.
“Mourinyo va Ronaldu — dahshatli ego sohiblari. Ikkalasi ham haqiqatni ko‘rmayapti. Ular boshqacharoq bo‘lganda yanada ko‘proq pul ishlab topardi. Ikkita sog‘lom bo‘lmagan insonlar. Biz katta pullar haqida gapiryapmiz, axir bu imij masalasi. Ularda hech kimga yoqmaydigan qiyofa bor. Bu antireklama!”
“Mendesh umuman hech narsani, hattoki, sirlarni ham bo‘lishmaydi. U nolga teng. Intervyuda ham. Hech narsada. Ular (Ronaldu va Mourinyo) Mendeshga e’tibor ham qaratmaydi”.
Kasilyas va Raulni “Real” tarixidagi eng buyuk qalloblar deb hisoblaydi
Florentino jamoa afsonasi Iker Kasilyas haqida ham fikr bildirgan. Nega u bilan munosib xayrlashmagani endi aniq bo‘ldi:“Bechora Kasilyas unchalik aqlli emas. Uni juda yaxshi bilaman. Yoqtirgan qizi bilan muammosi bo‘lsa, yosh bolalardek o‘zini yo‘qotib qo‘yadi. U xuddi kuchukchaga o‘xshaydi, bolalarcha qiliqlari bor.
Kasilyasni hamma yaxshi ko‘radi, bu hayratlanarli. Qarang: u ulkan emas va ko‘zi yaxshi ko‘rmaydi. Uning agentiga: ‘Do‘stim, uni oftalmologga olib bor. Menimcha, u uzoqni ko‘ra olmaydi’, — degandim.
Qasam ichaman, shunday dedim. Axir, uning foydasi uchun gapirgandim”.
“Kasilyas — “Real”ga munosib darvozabon emas. Nima aytishimni xohlagandingiz? Kasilyas hech kim bo‘lmagan. Iker — bizning eng katta muvaffaqiyatsizligimiz. Nima bo‘layotganini bilasizmi? Uni hurmat qilishadi, yaxshi ko‘rishadi, u haqida gapirishadi. Bilmayman nega ular Kasilyasni buncha himoya qiladi”.
Raul nega Zidanning izdoshi bo‘lmagani aniq bo‘ldi — Peres uni yoqtirmaydi:
“Bu katta qalloblardan biri (Kasilyas), ikkinchisi — Raul. “Real” tarixidagi eng katta qalloblar. Birinchisi — Raul, ikkinchisi — Kasilyas”, — El Confidencial tarqatgan audioyozuvlar shu gaplar jaranglaydi.
Qiziq, ikki futbolchi ham bir paytlar jamoa sardorlari bo‘lgan.
Del Boskeni ahmoq dedi
“U murabbiylikni bilmaydi, taktikani tushunmaydi. U ahmoq. Hech kim uni ishga olmaydi, chunki uning murabbiy emasligini hamma biladi (gaplar 2006-yilda del Boske ishsiz vaqtida yozib olingan). Del Boske — hayotimdagi eng katta aldovdir.
“Beshiktosh” prezidenti bilan gaplashing (del Boske 2004/05-yillarda Turkiya jamoasida ishlagan), u nima his qilayotganini aytadi. Del Boske — murabbiy emas.
Figu “Real”ga keldi va Raulning do‘stiga aylandi. Ular Yerro bilan birgalikda jamoani boshqarardi. Bechora Visente, uning joyi u yerda emasdi.
U terma jamoani boshqarmoqchi? Terma jamoaga del Boske yetishmay turgandi o‘zi”.
Keyinchalik del Boske Ispaniya terma jamoasi bilan JCh—2010 va Yevro—2012 ni qo‘lga kiritdi.
Jurnalist “Real”ga shantaj uyushtirgan: audioyozuvlarni tarqatmaslik uchun 10 million yevro talab qilgan
Jurnalist Xose Antonio Abellan o‘n yil oldin “Real”ga nisbatan shantaj uyushtirgandi. 2011-yilda u Madrid restoranlaridan birida “Real” vitse-prezidenti Eduardo Fernandes de Blasomdan audioyozuvlarni o‘chirib tashlash evaziga 10 million yevro berishni talab qiladi. Lekin klub bunga rozi bo‘lmaydi.Ushbu haftada esa audioyozuvlar birin-ketin El Confidencial gazetasida chiqa boshladi.
Peres gazetani sudga bermoqchi, u allaqachon bayonot berdi
Florentino Peres g‘urur va qadr-qimmatni himoya qilish uchun gazetani sudga bermoqchi. U kerakli hujjatlarni yuristlarga taqdim qildi.
“Real” esa Peresning rasmiy bayonotini e’lon qildi:
“Tarqatilgan yozuvlar suhbatning bir qismi edi. Ular Xose Antonio Abellan tomonidan sirli ravishda yozib olingan. U bir necha yil davomida audioyozuvlarni bizga sotmoqchi bo‘ldi. Muddati o‘tib ketgan bo‘lsa ham El Confidencial gazetasi ularni e’lon qildi.
Ular kontekstdan yulib olingan. Shuncha yildan keyin audioyozuvlarning tarqalishi Superligani tashkil qilganim bilan bog‘liq. Men buni yuristlarga topshirdim, ular vaziyatni o‘rganib chiqmoqda, nima qilish kerakligini ular hal qiladi”.
Izoh (0)