Ҳар трансфер ойнаси очилганда Гарет Бэйл қайси жамоага ўтиши муҳокамаси бошланади. Тўрт карра Чемпионлар Лигаси соҳиби қачонлардир энг қиммат футболчи мақомига эга бўлган. Бугун унинг фаолиятидаги энг қизиқ воқеалар тақдим этилади.
10. Бэйлга теккан «лаънат»
«Бугун ‘Тоттенҳэм’ ғалаба қозондими? Йўқ? Демак, Бэйл яна майдонга тушибди» — ўн йил аввал мана шу ибора машҳур бўлганди. Ҳозир эса ҳеч ким ўша пайтдаги тавқи лаънатни эсламайди. Бэйлнинг «Уарт Ҳарт Лейн»даги фаолияти оғир бошланган. У жамоа билан Премьер Лигада кетма-кет 24 та ўйинда ғалаба қозона олмаган. Бу омадсиз натижани «Фулҳэм» билан ўйинда тўхтатиши мумкин эди, Бэйл ҳисобни 3:1 кўринишига олиб келганди, аммо якунда «шпорлар» ғалабани қўлдан чиқарди. 2007 йил сентябрь ойидан 2009 йил сентябрига қадар Бэйл чемпионатда ғалаба таъмини татиб кўрмади. Ҳарри Реднапп уни «Бёрнли»га қарши ўйин 5:0 бўлиб турган вақтда беш дақиқага майдонга туширди. Бу ерда «лаънат» кучсиз эди.
9. Терма жамоа ва клубда 16 ёшида дебют
2006 йилнинг 17 апрелида Бэйл «Саутҳэмптон» сафида «Миллуолл»га қарши ўйинда (2:0) дебют қилди. Ўшанда Гарет 16 ёш-у 275 кунлик бўлган. Ўша йилнинг май ойида 16 ёш-у 315 кунлик Бэйл Уэльс сафида Тринидад ва Тобаго терма жамоасига қарши ўртоқлик ўйинида майдонга тушди. Бэйлни Райан Гиггз даражасидаги юлдуз сифатида кўра бошлашди. «Саутҳэмптон»да молиявий муаммолар бор эди, шунинг учун Бэйл у ерда кўп вақт қолмади. 2007 йилда «Тоттенҳэм» футболчини 5 миллион фунтга харид қилди.
8. Уэльс. Голф. Мадрид
«Бэйл — муҳим инсон, деб ҳисоблайман. У бироз ғалати йигитча бўлиб кўринади. У биринчи ўринда Уэльсни ўйлайди, кейин голф, ундан сўнг «Реал» ҳақида бош қотиради», — деганди «Реал»нинг собиқ футболчиси Предраг Миятович. Бэйл Мадрид жамоаси мухлислари билан ҳеч қачон илиқ муносабатда бўлмаган. Мухлислар доим уни танқид қилган, масалан, клубда ўйин ўтказмасдан 7 ойни жароҳат туфайли ўтказиб юбориб, Евро—2020 саралаш босқичида Венгрияга қарши ўйинга тайёр бўлгани учун. Уэльс мухлислари эса терма жамоа етакчисини қўллаб-қувватларди. Улар баннерларга «Уэльс. Голф. Мадрид» деган ёзувни ёзганди.
7. Индивидуал совринлар жамғармаси
2011 йил Бэйл Англияда профессионал футболчилар овозига кўра йилнинг энг яхши футболчиси номига сазовор бўлди. Орадан 2 йил ўтиб Гарет АПЛнинг энг нуфузли 3 та индивидуал совринини қўлга киритди. У яна футболчилар овозига кўра энг яхши футболчи номига сазовор бўлди, яна йилнинг энг яхши ёш футболчиси ва спорт журналистлари овозига кўра энг яхши ўйинчи бўлди. Ундан олдин фақатгина Криштиану Роналду совринлар бўйича ҳет-трикни қайд этган.
6. Дунёнинг энг қиммат футболчиси
Бэйлнинг қойилмақом ўйинлари ва «шпорлар»нинг Чемпионлар Лигаси финал босқичига чиқа олмаётгани Гаретга катта жамоаларнинг қизиқишини ошириб юборди. Энг яхши таклифни «Манчестер Юнайтед» берди, лекин Бэйлнинг ўзи «Реал»га ўтишни орзу қиларди. 2013 йилда бу орзу амалга ошди. Бэйл 85 миллион фунт стерлинг эвазига «Реал» сафига ўтди.
5. Бэйлнинг Чемпионлар Лигасидаги ҳикояси
Бэйл «Реал»даги илк мавсумидаёқ Чемпионлар Лигаси совринини қўлга киритди. Финалда «Атлетико» дарвозасига (4:1) муҳим голни урди. Орадан 2 йил ўтиб финалда яна «Атлетико» билан тўқнаш келди ва голли узатмани амалга оширди. 2017 йил «Ювентус»га қарши ўйиндаги финалда ҳам яхши ўйин намойиш этди. 2018 йилги финал ҳақида эса қуйироқда ҳикоя қиламиз.
4. Евро—2016 даги порлаш
Бэйл халқаро мусобақаларга чиқа олмаган Жорж Бест ва Райан Гиггз каби юлдузлар қаторига киришига оз қолганди. Лекин Евро—2016 га йўлланма 58 йиллик кутишга чек қўйди. Уэльс халқаро мусобақада иштирок этадиган бўлди. Гарет Бэйл учун Евро ажойиб ўтди. 3 та гол урди, улардан бири принципиал рақиб — Англия дарвозасига урилгани алоҳида аҳамиятга эга.
3. Испания Кубогидаги мўъжизавий гол
Мухлислар қалбига қандай йўл топиш мумкин? Йўли осон: Кубок финалида ашаддий рақибга қарши қойилмақом гол уриш орқали. Бэйл ижросидаги ажойиб гол «Реал»нинг «Барселона» устидан ғалаба қозониб, Испания Кубогини қўлга киритишига ёрдам берди. Уэльслик футболчи ўша голни фаолиятидаги энг муҳим гол деб ҳисоблайди.
2. Майкон учун «Такси»
2010 йилда Майкон дунёнинг энг яхши қанот ҳимоячиларидан бири эди. «Тоттенҳэм» эса Чемпионлар Лигасида иштирок этиш бахтига муяссар бўлганди. Бэйлнинг «Интер»га қарши ўйини ҳалигача мухлисларнинг ёдидан чиқмаган. Биринчи бўлимда «Тоттенҳэм» 0:4 ҳисобида мағлуб бўлаётганди, аммо иккинчи бўлимда Бэйл Майконнинг қанотидан ҳужумлар уюштириб 3 та гол урди. Майкон ўша ўйинда эндигина футбол ўйнашни бошлаган ёш футболчига ўхшаб қолганди. Жавоб ўйинида «Тоттенҳэм» «нерадзуррилар» устидан 3:1 ҳисобида ғалаба қозонди. Бэйл миланликларнинг устидан кулгандек 2 та голли узатмани амалга оширди.
1. Чемпионлар Лигасидаги унутилмас голлардан бири
2018 йилги Чемпионлар Лигаси финалида Бэйл майдонга тушганидан уч дақиқа ўтиб ЕЧЛ тарихидаги энг чиройли голлардан бирини урди. Акробатик усулда урилган голдан сўнг «Реал» ҳисобда олдинга чиқиб олди. Ўйин охирлаб бораётганда Бэйл «Ливерпуль» дарвозасига иккинчи голини ҳам урди ва 3:1 ҳисобида мадридликлар ғалабасини таъминлади.
Изоҳ (0)