Ishsizlik nafaqasi oluvchidan UFC chempionligiga qadar. Konor Makgregorning MMA’dagi “qonli yo‘li”

Konor Makgregor — oddiy irland oilasidan chiqqan, ishsizlik nafaqasini oluvchi insondan MMA’ning eng mashhur vakiliga aylangan, ushbu sport turi yanada ommalashishiga o‘zining ulkan hissasini qo‘shgan sportchi.

Bolalik

Konor 1988-yil 14-iyulda Irlandiya poytaxti Dublinda tavallud topgan. Toni Makgregor (taksi haydovchisi) va Margaret Makgregor ikki qizdan so‘ng o‘g‘il farzandli bo‘ldi. Otasining aytishicha, Konor qo‘lini musht qilgan holda tug‘ilgan. U xuddi jangga hozirlanayotgan bokschini eslatardi. Hamshiralar chaqaloq katta bo‘lsa, bokschi bo‘lishini aytib hazillashgandi.

Konor opalari Aofi va Erin bilan birga Kramlinda (Dublin yaqinidagi shaharcha) ulg‘aygan. Bolakay futbolga mehr qo‘ya boshladi. Mahalliy “Luders Seltik” jamoasida o‘ynardi va “Manchester Yunayted”ga muxlislik qilardi. 12 yoshida esa Crumlin Boxing Club’da boks bilan shug‘ullana boshlaydi.

2006-yilda Konor oilasi bilan Lukanga ko‘chib o‘tadi. Bu kichik Makgregorga yoqmaydi. Chunki uning barcha do‘stlari Kramlinda qolgandi. Lekin u norozilikni yig‘ishtirib, yangi muhitga moslashishni boshladi. Lukanda u Tom Igan (bo‘lajak UFC jangchisi) bilan tanishadi va ikki do‘st mashg‘ulotlarga qatnay boshlaydi.

Konorning oilasi

19 yoshli Konor Dublindagi tungi klublarga tez-tez borib turardi. Bir kuni u Di Devlinni (bo‘lajak turmush o‘rtog‘i) ko‘rib qoladi. Qizdan telefon raqamini oladi va ular doimiy xabarlashib turadigan bo‘ldi. Bir necha yildan so‘ng Konor Di Dublindan 30 kilometr uzoqlikda joylashgan uyni ijaraga oladi. O‘shanda Di kafeda ofitsiant bo‘lib ishlardi va uyga Konordan ko‘ra ko‘proq pul olib kelardi. Makgregor santexniklikni tashlab, ishsizlik nafaqasini olar (haftasiga 188 yevro) va kun-u tun mashg‘ulotlarga qatnardi. Bu narsa hech qachon Dini bezovta qilmasdi: “Qanaqadir muammo bor deb o‘ylamaganman. Men ishga, u esa mashg‘ulotlarga ketardi. Konor kun bo‘yi shug‘ullanardi va mendan ko‘proq charchardi. Uyga qaytgach, ishdan uzoq bo‘lardim, u esa ertalab soat 04:00 da uyg‘onib, yana mashq qilardi”.

Ertalab Di Konorni eski Porsche’sida zalga olib borardi, tunda esa uning orzulari haqida tinglardi.

“U doim menga ishongan. Ishlardi, ovqat tayyorlardi va uyni yig‘ishtirardi. Imkoniyatimiz cheklanganiga qaramasdan, Di mening foydali mahsulotlar iste’mol qilishimni nazorat qilardi. Menda hech narsa yo‘q edi, u esa menga ishonardi. Mashg‘ulotlardan charchab, uyga kelganimda u: ‘Konor, ishonaman, sen uddalaysan!’, deb ruhlantirardi”, — deydi Makgregor rafiqasi haqida.

Konor mashg‘ulotlarga yanada jiddiy qarardi. U daftarchasiga motivatsion gap yozib qo‘ygandi: “Tez orada Di ishdan bo‘shashi lozim”. Mana shu gap uni maqsadiga erishish uchun yanada kuchli mehnat qilishga undaydi.

Konor va Di uch nafar farzandni voyaga yetkazmoqda. To‘ng‘ich farzandi Jek Makgregor (2017-yil 6-mayda tug‘ilgan), o‘rtancha qizi Kroyya Makgregor (2019-yil 2-yanvarda tug‘ilgan) va kenjasi Rian Makgregor (2021-yil may).

Konor Makgregorning eng mashhur janglari:

Konor Makgregor—Joze Aldu

Konor Dennis Siverni mag‘lubiyatga uchratganidan so‘ng kamar uchun jang qilish huquqiga ega bo‘ldi. O‘shanda kamar braziliyalik Joze Alduda edi. Aldu 10 yillik faoliyatida 7 marta kamarni himoya qilgan va biror marta yutqazmagandi. Lekin Konor braziliyalikni qanday nokaut qilishini izohlab berdi.

Jangga tayyorgarlik vaqtida irlandiyalik sportchi tizzasidan jarohat oldi, bu orada Aldu ham jarohatlangandi. Braziliyalik afsona jarohat bilan jang qilishdan bosh tortdi. UFC rahbariyati bilan uchrashuvda Konor jangni boshqa vaqtga ko‘chirishga rozi bo‘lmadi va jarohatlangan bo‘lsa ham qafasga chiqishini aytdi. Alduning o‘rnini Chad Mendes egalladi. O‘rtaga esa vaqtinchalik chempionlik kamari qo‘yildi.

Ikkinchi raundda Konor Mendesni texnik nokaut hisobiga mag‘lub etdi. Oradan yarim yil o‘tib Joze Aldu bilan jang qildi. Konor 13 soniyada raqibini nokautga uchratdi va UFC tarixidagi chempionlik jangida eng tezkor g‘alabaga erishgan sportchiga aylandi.

Konor Makgregor—Neyt Diaz

Yarim yengil vazndagi chempionlikka erishganidan so‘ng Konor yengil divizion chempionligini ko‘zladi. O‘sha vaqtda Rafael dos Anyos bu kamarga egalik qilardi. UFC amaldagi ikki chempionning o‘zaro jangini tashkillashtirishga shoshildi. So‘nggi lahzalarda Dos Anyos jarohat oldi va uning o‘rnini o‘rtamiyona Neyt Diaz egalladi. Konor raqibini mensimagandi. Natijada Diaz g‘alaba qozondi. Revansh jangga esa Konor jiddiy tayyorgarlik ko‘rdi. 5 raund davom etgan jangda Makgregor ochkolar evaziga g‘olib bo‘ldi.

Konor Makgregor—Habib Nurmagomedov

Habib va Koron o‘rtasidagi jang UFC tarixidagi eng shov-shuvli to‘qnashuv hisoblanadi. Ular ishtirok etgan matbuot anjumani ham sport tarixidagi eng asabiysi bo‘ldi. 30 daqiqa davomida sportchilar bir-birini haqorat qilib o‘tirdi.

UFC’ning asosiy yulduzlari o‘rtasidagi jang 2018-yil 6-oktabrda Las-Vegasda bo‘lib o‘tdi. Nurmagomedov birinchi raundda ustunlik qildi. Tanaffusdan so‘ng Konor faoliyatida birinchi marta nokdaunga tushib qoldi. 3-raund asosan “stoyka”da kechdi va Konor dog‘istonlik sportchidan ustun keldi. 4-raundda esa Habib o‘z uslubini qo‘lladi va raqibini bo‘g‘ish usuli bilan taslim etdi.

Konor Makgregor—Dastin Porye (trilogiya)

Konor va Dastin uch bora bir-biriga qarshi jang o‘tkazdi. Birinchi jang 2014-yil 27-sentabrda bo‘lib o‘tgan. Konor birinchi raundda Poryeni nokautga uchratdi. Oradan 7 yil o‘tib ikki sportchi yana to‘qnash keldi. 2021-yil yanvar oyida bo‘lib o‘tgan jangda Porye Makgregorni texnik nokaut evaziga mag‘lubiyatga uchratdi. Konor esa revansh olishni maqsad qildi. Oradan yarim yil o‘tib, 11-iyulda Konor Makgregor va Dastin Porye o‘rtasidagi uchinchi jang bo‘lib o‘tdi. Konorning oyog‘i sinib ketgani bois jang birinchi raunddayoq to‘xtatildi.

Muvaffaqiyatga erishish sabablari

Konor juda ko‘p gapiradi, lekin qafas ichiga kirganida gaplarini amalda isbotlaydi. Sportchilar va murabbiylar Makgregor raqibiga psixologik bosim qilishni yaxshi ko‘rishini ta’kidlaydi. Ko‘p hollarda bu ish beradi.

Konorning tashqi ko‘rinishi ham muvaffaqiyatiga sabab bo‘lgan omillardan biri. 2008-yildagi sportchi bilan hozirgi Konorni solishtirib bo‘lmaydi. Qimmat kostyumlar, zamonaviy soch turmagi, ishlov berilgan soqol — bularning hammasi o‘z so‘zini aytadi. Undan tashqari mashg‘ulotlarda chiniqqan tanasi, tatiurovkalari va o‘ziga xos mimikasi Konorning boshqa jangchilardan ajralib turishini ta’minlaydi.

Makgregor fotosessiya, reklama kompaniyalariga ko‘p vaqt sarflasa-da mashg‘ulotlarni, o‘z ustida ishlash kerakligini unutib qo‘ymaydi. U doim mas’uliyatni his qiladi. Boshqa jangchi va chempionlardan farqli ravishda Konor jarohati sabab janglarni qoldirmaydi, doping muammolariga aralashib qolmaydi, narkotik moddalar iste’mol qilmaydi, rafiqasini urmaydi. Irlandiyalik sportchi jarohat sabab yoki diskvalifikatsiya sabab jangda ishtirok etmaslikni iqtisodiy muvaffaqiyatsizlik deb hisoblaydi. Shuning uchun u janglar orasida faqat rejalashtirilgan tanaffus qiladi va tibbiy ko‘riklarni jangdan keyinga qoldiradi.

Konorning boshqalardan ajralib turadigan xislatlari — betgachoparlik va o‘ziga bino qo‘yish. U o‘ziga hech qachon chegara qo‘ymaydi. O‘ylagan narsasini gapiradi. Futbol yulduzi Krishtianu Ronaldu haqidagi fikrlaridan ham Konorning naqadar o‘ziga ishonchi yuqoriligini ko‘rishimiz mumkin: “Hozirgi kunda Ronaldu fenomenal sportchi, fenomenal futbolchi. U erishgan sovrinlar ham shuni ko‘rsatib turibdi. O‘z ishiga sodiq. Krishtianu — eng zo‘r, albatta, mendan keyin”.

33 yoshli Makgregor MMA’da 2008-yildan buyon faoliyat yuritib keladi. U jami 28 ta jang o‘tkazib, ularning 22 tasida g‘alaba qozongan (19 tasi muddatidan avval) va 6 marta mag‘lub bo‘lgan. Konor UFC yengil va yarim yengil vazn toifalari sobiq chempioni hisoblanadi.