Бирлашган Араб Амирликлари 14 июль куни Исроилдаги Тель-Авив шаҳрида ўз элчихонасини расман очди. Бу ҳақда Associated Press хабар берди.
БААнинг Исроилдаги элчиси Муҳаммад ал-Хажанинг журналистларга айтишича, элчихона «янги ҳамкорликни янада ривожлантириш, низоларга эмас, балки мулоқотга интилиш, янги тинчлик парадигмасини яратиш ва Яқин Шарқдаги низоларни ҳал қилишда янги қўшма ёндашувни таъминлаш вазифаларини амалга ошириш учун асос бўлади».
Элчихонанинг очилиш маросимида сўзга чиққан Исроил президенти Ицхак Герцог элчихонанинг очилиши «Яқин Шарқда тинчлик, фаровонлик ва хавфсизликни таъминлаш йўлидаги муҳим босқич» эканини таъкидлади.
БАА элчихонаси Тель-Авивнинг бизнес тумани марказидаги Исроил фонд биржаси жойлашган бинода очилди.
2021 йилнинг июнь ойи охирида Абу-Дабида Исроил элчихонаси очилганди. Очилиш маросимида Исроил ташқи ишлар вазири Яир Лапид иштирок этди. Исроил 2020 йил сентябрь ойида АҚШ воситачилигида БАА билан дипломатик алоқаларни ўрнатган.
Март ойида тарихда биринчи марта БАА элчиси Исроилнинг Тель-Авив шаҳрига ташриф буюрганди.
Изоҳ (0)