Dunyo va o‘zbek sportiga oid 14-iyul tongining muhim xabarlari dayjesti bilan tanishing.
O‘zbekiston
“Buxoro” futbol klubining nomi “Nurafshon”ga o‘zgartirildi. Bu haqda klubning 13-iyul kuni o‘tkazilgan majlisida e’lon qilindi, deya xabar qilmoqda “Championat.asia”. Shuningdek, mazkur yig‘ilishda Tojikiston terma jamoasi sobiq ustozi Usmon Toshev “Nurafshon” klubi bosh murabbiyi etib tayinlangan. Aprel oyida klub Toshevni jamoa bosh direktori lavozimiga tayinlanganini e’lon qilgandi.Qayd etish kerak, Buxoro viloyatining bosh klubi 1989—1997-yillar davomida “Nurafshon” deb atalgan. Jamoa bu vaqt ichida o‘z tarixidagi eng yaxshi natijalarni qayd etgan.
Olmaliqning “OKMK” klubi 2021-yilgi mavsumning dastlabki qismini “Andijon”da o‘tkazgan italiyalik hujumchi Martin Boakeni o‘z safiga qo‘shib oldi. 26 yoshli futbolchi “konchilar” bilan “0,5+1” ko‘rinishida shartnoma imzolagan. Boake joriy mavsum Superligada 12 ta o‘yin o‘tkazib, 2 ta gol urgan. Avvalroq “Andijon”ning boshqa futbolchi Jasur Jaloliddinov Toshkentning “Lokomotiv” klubiga yo‘l olishi ma’lum bo‘lgandi.
Jahon
“Real” prezidenti Florentino Peres navbatdagi mojaro markazida qoldi. El Confidencial nashri funksionerning 2006-yil sentabrda jamoaning o‘sha vaqtdagi futbolchilari Iker Kasilyas va Raul borasida keskin fikrlar bildirgan audiyozuvini e’lon qildi. 2006-yilda Peres madridliklar prezidentligidan ketgandi va shu audioyozuvda Raulni bunga sababchi qilib ko‘rsatgan.“Kasilyas — “Real” uchun darvozabon emas. U bizning eng katta muvaffaqiyatsizligimiz. Uni juda qattiq himoya qilishadi. Bu eng buyuk firibgarliklardan biri, ikkinchi esa — Raul. “Real” tarixidagi ikki buyuk firibgar”, — deydi Florentino Peres audioyozuvda.
2006-yilda Raul “Real”da 12 mavsum harakat qilgan va so‘nggi ikki yilda jamoa sardori edi. Kasilyas esa 9 yil davomida madridliklar safida harakat qilgandi. Keyin darvozabon sardorlik bog‘ichini olgan. Ayni vaqtda har ikki sobiq futbolchi “Real” tizimida ishlamoqda. Raul “Kastilya” bosh murabbiyi bo‘lsa, Kasilyas 2020-yilda “Real” fondi bosh direktori o‘rinbosarligiga tayinlangandi.
“Real” Peresga qarshi va uni imijini tushirishga rejali harakatlar bo‘layotganini taxmin qilmoqda, klub bunda Superliga loyihasi dushmanlarining qo‘li bor, deb hisoblamoqda.
UEFA Yevro—2020 ramziy terma jamoasini e’lon qildi. Qizig‘i, undan musobaqa to‘purarlari Krishtianu Ronaldu va Patrik Shik o‘rin olmadi. Ronaldu faoliyati davomida ikkinchi marta Yevropa chempionati ramziy termasiga kiritilmadi. Birinchi marta portugaliyalik futbolchi 2008-yilgi musobaqada top-11 likdan joy ololmagandi. Eslatib o‘tamiz, bu Ronaldu uchun beshinchi Yevro bo‘lgandi.
Darvozabon: Janluiji Donnarumma (Italiya);
Himoyachilar: Kayl Uoker, Harri Maguayr (ikkisi Angliya), Leonardo Bonuchchi, Leonardo Spinatssola (ikkisi Italiya);
Yarimhimoyachilar: Jorjinyo (Italiya), Pyer-Emil Hyoybyerg (Daniya), Pedri (Ispaniya);
Hujumchilar: Rahim Sterling (Angliya), Federiko Kyeza (Italiya), Romelu Lukaku (Belgiya).
KONMEBOL Kopa Amerika—2021 ramziy terma jamoasini tuzdi
Darvozabon: Emiliano Martines (Argentina);
Himoyachilar: Maurisio Isla (Chili), Kristian Romero (Argentina), Markinyos (Braziliya), Pervis Estupinyan (Kolumbiya);
Yarimhimoyachilar: Rodrigo De Paul (Argentina), Kazemiro (Braziliya), Yosimar Yotun (Peru);
Hujumchilar: Lionel Messi (Argentina), Neymar (Braziliya), Luis Dias (Kolumbiya).
Yevro—2020 va Amerika Kubogi—2021 chempionlari o‘rtasida uchrashuv o‘tkazilishi mumkin. TyC Sports’ning xabar qilishicha, KONMEBOL bu borada UEFAga taklif bilan chiqqan. Biroq tig‘iz taqvim sabab uchrashuvni 2021-yilda o‘tkazish ilojsiz. O‘yin 2022-yilda bo‘lib o‘tishi mumkin. Ikki mamlakat federatsiyalari UEFAning javobini kutib o‘tirmoqchi emas va o‘zaro o‘rtoqlik o‘yini tashkil etish borasida muzokaralarni boshlagan, deya xabar qildi jurnalist Tariq Panja. Aytilishicha, bu o‘yin Diyego Maradona xotirasiga bag‘ishlanadi.
Markus Reshford uzoq muddatga safdan chiqishi mumkin. “Manchester Yunayted” hujumchisi yelkasidagi jarohat sabab operatsiya qilinishi kutilmoqda, deya xabar qilmoqda The Telegraph. Tibbiy ko‘rikdan keyin Reshfordning 2020-yil noyabrida olgan jarohati yomonlashgani ma’lum bo‘ldi. Futbolchi operatsiya qilinadigan bo‘lsa, oktabr oyiga qadar maydonga tusha olmaydi.
Izoh (0)