“Everton” futbolchisi Xames Rodriges 12-iyul kuni 30 yoshni qarshi oldi. Kolumbiyalik hujumkor yarim himoyachi haqida siz bilmagan 8 ta ma’lumotni taqdim etamiz.
Xames Rodrigesning otasi farzandining ismini Jeyms Bond sharafiga qo‘ygan. “Everton” futbolchisi va agent M16 ning ismi inglizchada bir xil yoziladi — James. Kolumbiyalik futbolchining o‘zi bu hikoyani yoqtirmaydi va ismini ispancha talaffuz bilan aytishlarini istaydi. Shuning uchun uning ismi Jeyms emas, Xames.
Xames bolaligida duduqlanishdan aziyat chekkan. Logoped huzurida soatlab mashg‘ulotlarda qatnashishga majbur bo‘lardi. Hozir uning jurnalistlar bilan suhbatiga e’tibor qaratilsa, uyalib gaplashishiga guvoh bo‘lish mumkin. Bu yoshlikdagi muammoning asorati.
Xamesning ikkita kumiri bo‘lgan. Birinchisi — Krishtianu Ronaldu. U bilan “Real”da birga o‘ynash nasib etdi. Ikkinchisini ko‘pchilik tanimaydi. Subasa Ozoro — “Kapitan Subasa” nomli yapon multfilmi qahramoni. U kunchiqar yurt uchun Jahon Kubogini qo‘lga kiritishni orzu qilardi.
2009-yilda Rodriges Argentina chempionatida birdaniga 3 ta rekordni qayd etdi. Dastlab, musobaqaning eng yosh legioner futbolchisi sifatida tarixga kirdi, shundan so‘ng ligada gol urgan eng yosh legionerga aylandi, mavsumni esa eng yosh legioner chempion maqomida yakunladi. Xames “Banfild” bilan Argentina chempionligiga erishgan.
Xamesning sobiq turmush o‘rtog‘i — kolumbiyalik darvozabon David Ospinaning singlisi Daniela Ospina. Ularning Salomeya ismli qizi bor. Xames tez-tez qizidan xabar olib turadi.
Ko‘pchilik futbolchilardan farqli ravishda Xames oliy ma’lumotli injener hisoblanadi. Professional faoliyati bilan bir paytda Rodriges Abiyerta Milliy Universitetini tamomlagan.
Xames basketbol muxlisi. Uning sevimli basketbolchisini taxmin qilish oson — Lebron Jeyms. Rodrigesning “adashi”.
Xames Rodrigesning “Real” futbolchisi sifatida tanishtiruv marosimiga 40 mingdan ortiq muxlis tashrif buyurgan. Braziliyadagi mundialdan so‘ng futbolchi mashhurlikka erishgandi.
Izoh (0)