“Navbahor” ko‘rigidan o‘tayotgan braziliyalik futbolchilar, jarrohlik stoliga yotgan Konor Makgregor va g‘alabasini Maradonaga bag‘ishlagan Messi. Eng so‘nggi sport yangiliklari

O‘zbekiston

Yaqindagina Samvel Babayan bilan kelishuvga erishgan “Navbahor” jamoa tarkibini kuchaytirish yo‘lidagi ishlarini boshladi. Hozirda Namangan klubida 5 nafar legioner ko‘rikdan o‘tmoqda. Ular orasida ikki nafar braziliyalik futbolchi ham bor. Shuningdek, yana ikki nafar o‘yinchi Serbiyadan taklif qilingan. Bundan tashqari, Rossiyadan tashrif buyurgan futbolchi ham “lochinlar” safidan joy olishga harakat qilib ko‘radi. Klub matbuot xizmati xabariga ko‘ra, ko‘rikka kelgan besh futbolchidan faqat ikki nafari tanlab olinadi.

“Turon” esa 2020-yilgi mavsumda Tojikiston chempionatining eng yaxshi himoyachisi deb topilgan Firdavs Chakalov bilan shartnoma imzoladi. Chakalov bungacha “Xo‘jand” klubi sharafini himoya qilgan.

Jahon

“Aqlbovar qilmas musobaqa bo‘ldi. Barcha futbolchilar bor kuchini berib harakat qildi. Ushbu jamoaning sardori bo‘lish baxtiga muyassar bo‘lganimdan faxrlanaman. Men bu g‘alabani oilamga, do‘stlarimga va bizga ishongan barcha insonlarga bag‘ishlamoqchiman. Avvalo, koronavirus pandemiyasi sabab og‘ir vaqtni boshdan kechirgan 45 million argentinalikka. Bu g‘alaba barchamiz va albatta, qayerda bo‘lmasin, bizni qo‘llab-quvvatlovchi Diyego Maradona uchun”, — deya yozadi Messi o‘z Instagram sahifasida.

Bir oy davomida barcha futbol ixlosmandlari e’tiborini tortgan Yevro—2020 o‘z nihoyasiga yetdi. Final o‘yinida Italiya penaltilar seriyasida Angliyani mag‘lubiyatga uchratdi. Musobaqa davomida o‘tkazilgan 51 o‘yinda jamoalar tomonidan umumiy hisobda 142 ta gol kiritildi. Shu tariqa musobaqa tarixidagi sermahsullik borasidagi rekord yangilandi. Bundan avvalgi rekord 2016-yilda qayd etilgandi — 108 ta gol.

Shuningdek, musobaqa yakunlariga ko‘ra nominatsiyalar bo‘yicha eng yaxshilar aniqlandi:

• eng yaxshi futbolchi — Janluiji Donnarumma (Italiya);
• eng yaxshi to‘purar — Krishtianu Ronaldu, 5 ta gol (Portugaliya);
• eng yaxshi assistent — Stiven Zuber, 4 ta uzatma (Shveysariya);
• eng yaxshi yosh futbolchi — Pedri (Ispaniya);
• eng yaxshi darvozabon — Jordan Pikford (Angliya).

Virjil van Deyk jarohatidan forig‘ bo‘lib, “Liverpul”ning umumiy guruh mashg‘ulotlariga qo‘shildi. Niderlandiyalik himoyachi 2020/21-yilgi mavsum avvalida tizzasidan jiddiy jarohat olib, uzoq muddatga safdan chiqqandi.

11-iyul kuni futbol bo‘yicha KONKAKAF Oltin Kubogi start oldi. Musobaqada 16 ta jamoa 4 ta guruhga bo‘lingan holda o‘zaro bahs olib boradi.

11 va 12-iyul kunlari A va B guruhlarida 1-tur o‘yinlari o‘tkazildi. B guruhida AQSh Gaitini (1:0), Kanada Martinikani (4:1) mag‘lub etib, 3 ochkodan jamg‘argan holda yetakchilik qilmoqda. A guruhida Meksika Trinidad Tobago bilan murosa yo‘lini tanladi (0:0), Salvador esa Gvatemaladan 2:0 hisobida ustun keldi.

MMA

Konor Makgregorning Dastin Poryega qarshi jangida sindirib olgan oyog‘i operatsiya qilindi. Ma’lumotlarga ko‘ra, operatsiya jarayoni 3,5 soat davom etgan. Uning katta boldir suyagiga sterjen o‘rnatilgan, kichik boldir suyagiga esa plastina va vint qo‘yilgan. Konorning o‘zi olti haftadan so‘ng qaytishini ma’lum qildi.

Shuningdek, uning Porye bilan jangdan qancha ishlab olgani ham ma’lum bo‘ldi. The Sports Daily’ning yozishicha, Makgregor 5 million 11 ming dollar gonorar olgan. Dastin Poryeda esa bu ko‘rsatkich 1 million 21 ming dollarga teng.