Дунё ва ўзбек спортига оид 14 июль тонгининг муҳим хабарлари дайжести билан танишинг.
Ўзбекистон
«Бухоро» футбол клубининг номи «Нурафшон»га ўзгартирилди. Бу ҳақда клубнинг 13 июль куни ўтказилган мажлисида эълон қилинди, дея хабар қилмоқда «Championat.asia». Шунингдек, мазкур йиғилишда Тожикистон терма жамоаси собиқ устози Усмон Тошев «Нурафшон» клуби бош мураббийи этиб тайинланган. Апрель ойида клуб Тошевни жамоа бош директори лавозимига тайинланганини эълон қилганди.Қайд этиш керак, Бухоро вилоятининг бош клуби 1989—1997 йиллар давомида «Нурафшон» деб аталган. Жамоа бу вақт ичида ўз тарихидаги энг яхши натижаларни қайд этган.
Олмалиқнинг «ОКМК» клуби 2021 йилги мавсумнинг дастлабки қисмини «Андижон»да ўтказган италиялик ҳужумчи Мартин Боакени ўз сафига қўшиб олди. 26 ёшли футболчи «кончилар» билан «0,5+1» кўринишида шартнома имзолаган. Боаке жорий мавсум Суперлигада 12 та ўйин ўтказиб, 2 та гол урган. Аввалроқ «Андижон»нинг бошқа футболчи Жасур Жалолиддинов Тошкентнинг «Локомотив» клубига йўл олиши маълум бўлганди.
Жаҳон
«Реал» президенти Флорентино Перес навбатдаги можаро марказида қолди. El Confidencial нашри функционернинг 2006 йил сентябрда жамоанинг ўша вақтдаги футболчилари Икер Касильяс ва Рауль борасида кескин фикрлар билдирган аудиёзувини эълон қилди. 2006 йилда Перес мадридликлар президентлигидан кетганди ва шу аудиоёзувда Раулни бунга сабабчи қилиб кўрсатган.«Касильяс — «Реал» учун дарвозабон эмас. У бизнинг энг катта муваффақиятсизлигимиз. Уни жуда қаттиқ ҳимоя қилишади. Бу энг буюк фирибгарликлардан бири, иккинчи эса — Рауль. «Реал» тарихидаги икки буюк фирибгар», — дейди Флорентино Перес аудиоёзувда.
2006 йилда Рауль «Реал»да 12 мавсум ҳаракат қилган ва сўнгги икки йилда жамоа сардори эди. Касильяс эса 9 йил давомида мадридликлар сафида ҳаракат қилганди. Кейин дарвозабон сардорлик боғичини олган. Айни вақтда ҳар икки собиқ футболчи «Реал» тизимида ишламоқда. Рауль «Кастиля» бош мураббийи бўлса, Касильяс 2020 йилда «Реал» фонди бош директори ўринбосарлигига тайинланганди.
«Реал» Пересга қарши ва уни имижини туширишга режали ҳаракатлар бўлаётганини тахмин қилмоқда, клуб бунда Суперлига лойиҳаси душманларининг қўли бор, деб ҳисобламоқда.
УЕФА Евро—2020 рамзий терма жамоасини эълон қилди. Қизиғи, ундан мусобақа тўпурарлари Криштиану Роналду ва Патрик Шик ўрин олмади. Роналду фаолияти давомида иккинчи марта Европа чемпионати рамзий термасига киритилмади. Биринчи марта португалиялик футболчи 2008 йилги мусобақада топ-11 ликдан жой ололмаганди. Эслатиб ўтамиз, бу Роналду учун бешинчи Евро бўлганди.
Дарвозабон: Жанлуижи Доннарумма (Италия);
Ҳимоячилар: Кайл Уокер, Ҳарри Магуайр (иккиси Англия), Леонардо Бонуччи, Леонардо Спинаццола (иккиси Италия);
Яримҳимоячилар: Жоржиньо (Италия), Пьер-Эмиль Ҳёйбьерг (Дания), Педри (Испания);
Ҳужумчилар: Раҳим Стерлинг (Англия), Федерико Кьеза (Италия), Ромелу Лукаку (Бельгия).
КОНМЕБОЛ Копа Америка—2021 рамзий терма жамоасини тузди
Дарвозабон: Эмилиано Мартинес (Аргентина);
Ҳимоячилар: Маурисио Исла (Чили), Кристиан Ромеро (Аргентина), Маркиньос (Бразилия), Первис Эступиньян (Колумбия);
Яримҳимоячилар: Родриго Де Пауль (Аргентина), Каземиро (Бразилия), Ёсимар Йотунь (Перу);
Ҳужумчилар: Лионель Месси (Аргентина), Неймар (Бразилия), Луис Диас (Колумбия).
Евро—2020 ва Америка Кубоги—2021 чемпионлари ўртасида учрашув ўтказилиши мумкин. TyC Sports’нинг хабар қилишича, КОНМЕБОЛ бу борада УЕФАга таклиф билан чиққан. Бироқ тиғиз тақвим сабаб учрашувни 2021 йилда ўтказиш иложсиз. Ўйин 2022 йилда бўлиб ўтиши мумкин. Икки мамлакат федерациялари УЕФАнинг жавобини кутиб ўтирмоқчи эмас ва ўзаро ўртоқлик ўйини ташкил этиш борасида музокараларни бошлаган, дея хабар қилди журналист Тариқ Панжа. Айтилишича, бу ўйин Диего Марадона хотирасига бағишланади.
Маркус Рэшфорд узоқ муддатга сафдан чиқиши мумкин. «Манчестер Юнайтед» ҳужумчиси елкасидаги жароҳат сабаб операция қилиниши кутилмоқда, дея хабар қилмоқда The Telegraph. Тиббий кўрикдан кейин Рэшфорднинг 2020 йил ноябрида олган жароҳати ёмонлашгани маълум бўлди. Футболчи операция қилинадиган бўлса, октябрь ойига қадар майдонга туша олмайди.
Изоҳ (0)