Buxoroda Davlat xizmatlari agentligi 2021-yilning o‘tgan olti oyi davomida vakolatli organlar tomonidan aholi noroziligiga sabab bo‘lgan 8680 ta qonunbuzilish holatini aniqladi. Bu haqda “Daryo”ga Davlat xizmatlari agentligi viloyat boshqarmasi axborot xizmati rahbari Farrux To‘raqulov xabar berdi.
Ta’kidlanishicha, 8680 ta qonunbuzilish holatining 2889 tasi vakolatli organlar tomonidan sodir etilgan.“Ular sirasiga sog‘liqni saqlash muassasalari, yer resurslari va davlat kadastri, qurilish va arxitektura idoralari, ‘O‘zbekenergo’, shuningdek, DSENM kabi qator vakolatli organlar kiradi”, — deydi Farrux To‘raqulov.
Qayd etilishicha, mas’ullar tomonidan 2889 ta holatda murojaatga javob berishda muddat buzilishi, shundan 766 ta holatda to‘g‘ridan to‘g‘ri xizmat ko‘rsatilgan bo‘lsa, 277 ta holatda ortiqcha hujjat talab qilingan. 146 ta holatda esa aholi murojaatlari asossiz rad qilingan. Shuningdek, yana 4594 ta boshqa qonunbuzilish holati vakolatli organ xodimlarining aybi bilan yuzaga kelgan.
“Tezkor va qulay davlat xizmatlari ko‘rsatilishi talab qilinayotgan bir paytda mutasaddi davlat tashkilotlarining tizimda bunday qonunbuzilish holatlari sodir etishi aholining noroziligini oshirishgagina xizmat qiladi. Har bir davlat tashkiloti o‘z ishiga e’tibor va mas’uliyat bilan yondashmas ekan, odamlarning ertangi kunga ishonchi qolmaydi. Ushbu holatlarni bartaraf etish yuzasidan davlat tashkilotlariga 8 ta taqdimnoma va 137 ta ogohnoma kiritildi. 99 nafar shaxsning ma’muriy javobgarligi yuzasidan bayonnoma rasmiylashtirildi hamda yuqori turuvchi organlarga juda ko‘plab taqdimnomalar kiritilmoqda”, — dedi Davlat xizmatlari agentligi viloyat boshqarmasi bo‘limi boshlig‘i Hafiz Boboqulov.
Izoh (0)