Toshkent viloyatining Ohangaron tumanida 265,7 million so‘mlik kuchli ta’sir etuvchi dori vositalarining noqonuniy muomalaga kiritilishining oldi olindi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.
Ma’lum qilinishicha, Departament hamda DBQning Toshkent viloyati boshqarmalari tomonidan IIB xodimlari bilan hamkorlikda Ohangaron tumanida o‘tkazilgan tezkor tadbirda fuqaro X.R. boshqaruvidagi Epica ko‘zdan kechirilganda, uning yukxonasida hech qanday hujjatlari bo‘lmagan 13 092 dona “Regapen”, 15 078 dona “Perge” va 394 dona “Tropikamid” nomli umumiy qiymati 265,7 million so‘mlik kuchli ta’sir etuvchi dori vositalari mavjudligi aniqlanib, ashyoviy dalil sifatida olingan.
Mazkur holat yuzasidan Jinoyat kodeksining 186-3-moddasi (tarkibida kuchli ta’sir qiluvchi moddalar mavjud bo‘lgan dori vositalarini retsept bo‘yicha chakana realizatsiya qilish tartibini buzish) bilan jinoyat ishi qo‘zg‘atilib, tergov harakatlari o‘tkazilmoqda.
Izoh (0)