Adliya vaziri Ruslanbek Davletov AOKAda o‘tkazilgan matbuot anjumanida 2021-yilning 6-iyul kuni imzolangan “Korrupsiyaga qarshi kurashish faoliyatini samarali tashkil etishga doir qo‘shimcha chora-tadbirlar to‘g‘risida”gi Prezident qarori haqida gapirarkan, qaror loyihasi muhokamasi paytida mavjud bo‘lgan “tadbirkorlik bilan shug‘ullanishi qat’iyan taqiqlanadigan davlat mansabdorlari ro‘yxatini belgilash haqidagi” band nima sababdan chiqarib yuborilganiga oid savolga izoh berdi. Bu haqda “Daryo” muxbiri xabar qilmoqda.
“Muhokamaga qo‘yilgan bandda Adliya vazirligi Bosh prokuratura hamda boshqa manfaatdor vazirlik va idoralar bilan birgalikda 2021-yil 1-oktabrga qadar tadbirkorlik faoliyati bilan shug‘ullanishi qat’iyan taqiqlangan davlat organlarining mansabdor shaxslari va xodimlarining ro‘yxatini belgilash bo‘yicha takliflarni kiritish yuzasidan topshiriq yozilgan edi.
Xuddi shu band turibdi, faqat ‘aniq ro‘yxati’ deyilmasdan, o‘rniga ‘davlat xizmatchilari tomonidan tadbirkorlik faoliyatida ishtirok etganligining huquqiy oqibatlarini belgilashni nazarda tutuvchi qonun loyihasi’ga almashtirildi. Ya’ni bu masala ochiq qolyapti, degan ma’no kelib chiqmayapti”, — dedi Davletov.
Uning ta’kidlashicha, amaldorlarga tadbirkorlik qilish bugungi qonunchilikda taqiqlangan.
“Davlat xizmatchilariga bugungi kunda tadbirkorlik faoliyati bilan shug‘ullanish taqiqlanganligi amaldagi qonunda turibdi. Birinchidan, 2016-yilda hukumat tomonidan tasdiqlangan ‘Davlat boshqaruvi organlari va mahalliy ijro etuvchi hokimiyat organlari xodimlarining odob-axloq namunaviy qoidalari’ hujjatida amaldorlarning tadbirkorlik bilan shug‘ullanishiga taqiq qo‘yilgan. Ikkinchidan, hukumatning 1992-yildagi 103-sonli qaroriga asosan, tadbirkorlik faoliyati bilan shug‘ullanishi taqiqlangan mansabdor shaxslarning ro‘yxati tasdiqlangan”, — dedi adliya vaziri.
Uning qayd etishicha, amaldagi qonunchilikka ko‘ra, davlat xizmatchilari yakka tartibda tadbirkorlik qila olmaydi, xolos, ammo MChJ ta’sischisi bo‘lishga haqli.
“Tadbirkorlik faoliyati degani, nima degani? Agar ‘Tadbirkorlik faoliyati kafolatlari to‘g‘risida’gi qonunga qaraydigan bo‘lsak, tadbirkorlik bu tavakkalchilik evaziga o‘zining faoliyatidan kelib chiqib, tizimli ravishda daromad olishga mo‘ljallangan faoliyat turi hisoblanadi.
Amaldor tadbirkorlik faoliyati bilan shug‘ullansin deganda, bugungi kundagi qonunchilik bo‘yicha faqat tushuniladiki, yakka tartibdagi tadbirkor bo‘lishi mumkin emas, degan ma’no chiqadi.
Lekin agar mas’uliyati cheklangan jamiyat ta’sischisi bo‘lsa, bugungi kundagi qonunchilik bo‘yicha, bu tadbirkorlik faoliyati hisoblanmaydi. Va bu tartib bizga to‘g‘ri kelmaydi, biz buni qayta ko‘rib chiqib, mana shu takliflarni beryapmiz.
Davlat xizmatchilari MChJ ta’sischisi bo‘lolmaydi, degan norma mana yaqinda Rossiyada ham kiritildi, boshqa davlatlarda ham bor”, — dedi Ruslanbek Davletov.
Davletov manfaatlar to‘qnashuvi bilan tadbirkorlikni aralashtirmaslik kerakligini aytdi.
“Qurilish vazirligi hamda Jizzaxda bo‘lgan holatlar tadbirkorlik faoliyati bilan shug‘ullanish emas. Bu manfaatlar to‘qnashuvi, degan masala. Manfaatlar to‘qnashuvi bilan tadbirkorlikni aralashtirmaslik kerak.
Manfaatlar to‘qnashuviga mansabdor shaxsning qarindoshlariga tegishli kompaniyalar yoki uning obyektiv qaror qabul qilishiga ta’sir ko‘rsatuvchi omillar kiradi. Mansabdor shaxs bu holatda qaror qabul qilishdan chetlatilishi lozim.
Mana shu holatlar bo‘yicha alohida qonun ishlab chiqish belgilangan. Buni Adliya vazirligi ishlab chiqib, oxiriga yetkazyapti”, — dedi u.
Izoh (0)