Бухорода Давлат хизматлари агентлиги 2021 йилнинг ўтган олти ойи давомида ваколатли органлар томонидан аҳоли норозилигига сабаб бўлган 8680 та қонунбузилиш ҳолатини аниқлади. Бу ҳақда «Дарё»га Давлат хизматлари агентлиги вилоят бошқармаси ахборот хизмати раҳбари Фаррух Тўрақулов хабар берди.
Таъкидланишича, 8680 та қонунбузилиш ҳолатининг 2889 таси ваколатли органлар томонидан содир этилган.«Улар сирасига соғлиқни сақлаш муассасалари, ер ресурслари ва давлат кадастри, қурилиш ва архитектура идоралари, ‘Ўзбекэнерго’, шунингдек, ДСЭНМ каби қатор ваколатли органлар киради», — дейди Фаррух Тўрақулов.
Қайд этилишича, масъуллар томонидан 2889 та ҳолатда мурожаатга жавоб беришда муддат бузилиши, шундан 766 та ҳолатда тўғридан-тўғри хизмат кўрсатилган бўлса, 277 та ҳолатда ортиқча ҳужжат талаб қилинган. 146 та ҳолатда эса аҳоли мурожаатлари асоссиз рад қилинган. Шунингдек, яна 4594 та бошқа қонунбузилиш ҳолати ваколатли орган ходимларининг айби билан юзага келган.
«Тезкор ва қулай давлат хизматлари кўрсатилиши талаб қилинаётган бир пайтда мутасадди давлат ташкилотларининг тизимда бундай қонунбузилиш ҳолатлари содир этиши аҳолининг норозилигини оширишгагина хизмат қилади. Ҳар бир давлат ташкилоти ўз ишига эътибор ва масъулият билан ёндашмас экан, одамларнинг эртанги кунга ишончи қолмайди. Ушбу ҳолатларни бартараф этиш юзасидан давлат ташкилотларига 8 та тақдимнома ва 137 та огоҳнома киритилди. 99 нафар шахснинг маъмурий жавобгарлиги юзасидан баённома расмийлаштирилди ҳамда юқори турувчи органларга жуда кўплаб тақдимномалар киритилмоқда», — деди Давлат хизматлари агентлиги вилоят бошқармаси бўлими бошлиғи Ҳафиз Бобоқулов.
Изоҳ (0)