Қозоғистонда эпидемиологик вазиятнинг ёмонлашуви муносабати билан Идоралараро комиссия «қизил» зонада жойлашган ҳудудларда карантин чекловларини кучайтириш бўйича чоралар кўрди. Бу ҳақда Tengrinews хабар берди.
Бош вазир ўринбосари Эрали Тугжанов шаҳарлараро, минтақалараро, шаҳарлардаги мунтазам ва номунтазам (туристик) автобус ва микроавтобуслар ҳаракатини, шунингдек, ёпиқ пляжлар ва аквапарклар фаолиятини тўхтатиб туришни буюрди.
Шунингдек, Қозоғистонда дам олиш ва таътил кунларида қуйидаги объектларнинг фаолиятини тақиқлаш тўғрисида қарор қабул қилинди:
- жамоавий овқатланиш объектлари;
- фитнес марказлари, фитнес-клублари, ёга марказлари, спорт ва дам олиш масканлари, сауналар, SPА-марказлари, сузиш ҳавзалари;
- кинотеатрлар, театрлар, концерт заллари, филармониялар, компьютер клублари, боулинг заллари, билярд хоналари, караоке, кўргазмалар;
- майдони 2000 квадрат метргача бўлган ноозиқ-овқат маҳсулотларини сотиш объектлари, очиқ бозорлар, ярмаркалар;
- спорт объектлари (спорт мажмуалари, спорт мактаблари, спорт клублари, машғулотлар заллари);
- ўқув марказлари, болалар ва катталар учун тўгараклар, болаларни ривожлантириш марказлари;
- фудкортлар.
Мамлакатда иш кунлари қуйидаги объектлар фаолиятини чеклаш бўйича кўрсатма берилди:
- Ashyq лойиҳасида иштирок этадиган фитнес марказлари, фитнес-клублари, ёга марказлари, спорт ва дам олиш масканлари, сауналар, SPА-марказлари, спорт иншоотлари, сузиш ҳавзалари соат 20:00 гача;
- савдо ва кўнгилочар марказлар, савдо уйлари, чакана савдо тармоқлари соат 18:00 гача;
- Айшқ лойиҳасида иштирок этадиган овқатланиш шохобчалари, фудкортлар соат 20:00 гача, лойиҳада қатнашмайдиганлар — соат 18:00 гача.
Маълумот учун, айни пайтда Нур-Султон, Олмаота, Чимкент, Оқмола, Ақтўбе, Атирау, Ғарбий Қозоғистон, Қарағанда, Қўстаной, Мангистов ва Павлодар вилоятлари «қизил» зонага киритилган.
Аввалроқ Қозоғистонда коронавирусга чалинганлар сони бўйича кунлик рекорд янгилангани, Нур-Султонда карантин чекловлари яна кучайтирилгани, пойтахтда коронавируснинг «ҳиндча» штамми қайд этилгани ҳақида хабарлар берилганди.
Изоҳ (0)