Namanganda tanishining yuziga kuydiruvchi suyuqlik sepib, uning tilla taqinchoqlari va telefonini olib qochgan yigit qo‘lga olindi. Bu haqda viloyati IIB axborot xizmati xabar berdi.
Ma’lum qilinishicha, 9-iyul kuni soat 23:22 da viloyat IIB 102-tizimi operatoriga murojaat kelib tushgan. Unda aytilishicha, Davlatobod tumanida yashovchi 1980-yilda tug‘ilgan ayol shu kuni soat 22:30 larda xususiy shifoxonada navbatchilik qilib turganida Murodjon ismli tanishi u bilan ko‘rishib, gaplashib olish maqsadida kelgan.
Ayol uni ixtiyoriy ravishda xususiy shifoxonaga olib kirib, o‘zaro gaplashib o‘tirgan vaqtida yigit uning bo‘ynidan bo‘g‘gan va pul yoki boshqa moddiy qimmatlikdagi buyumlarni berishni talab qilgan. Ayolning yuz qismiga polietilen idishda bo‘lgan suyuqlikni sepib, bo‘ynidagi narxi 3 million so‘mlik zanjir, qulog‘idagi narxi 4,5 million so‘mlik tilla zirak hamda narxi 4,5 million so‘m turuvchi Huawei telefonini bosqinchilik yo‘li bilan olib, hodisa joyidan noma’lum tomonga yashiringan.
RShTYOIM Namangan filialining dastlabki ma’lumotnomasida ayolning chap ko‘zi, og‘iz-labi va yuz terisi kuygani ko‘rsatilgan.
IIV JQBB xodimlari, viloyat IIB JQB, va Namangan shahar IIO FMB JQB xodimlari tomonidan olib borilgan tezkor-qidiruv va surishtiruv harakatlari natijasida ushbu jinoyatni Andijon viloyati Baliqchi tumanida yashovchi 23 yoshli N.Murodjon sodir etgani aniqlangan.
Ushbu holat bo‘yicha Namangan shahar IIO FMB huzuridagi Tergov bo‘limi tomonidan 2021-yil 10-iyul kuni Jinoyat kodeksining 164-moddasi (bosqinchilik) 1-qismi bilan jinoyat ishi qo‘zg‘atilib, gumonlanuvchi Jinoyat protsessual kodeksining 221-moddasi tartibida ushlangan.
Avvalroq Buxoroda bosqinchilik yo‘li bilan nogiron fuqaroning mol-mulkini talon-toroj qilgan yoshlarga sud hukmi o‘qilgan, Toshkentga ketayotgan taksi haydovchisiga tosh bilan hujum qilib, yonidagi 4800 dollarni olib qochgan shaxs qo‘lga olingan edi.
Izoh (0)