Энергетика вазирлиги матбуот котиби Элмира Бекмуродова сўнгги кунларда электр энергиясида узилишлар бўлаётгани туфайли баёнот билан чиқди.
Матбуот котиби Энергетика вазирлиги ижтимоий тармоқлардаги саҳифалари орқали узилишлар ҳақида тез-тез маълумотлар бериб борилиши, аммо ҳар бир узилиш ҳолати норозиликни келтириб чиқариши ва баъзан етарлича тортишувлар бўлишини тўғри тушунишини таъкидлаб ўтган.
«Негаки соҳада ҳар қандай об-ҳаво ва куннинг ҳар қандай вақтида хонадонингизда электр энергияси бўлиши учун таъминот билан боғлиқ ҳар бир узилишларни имкон қадар тезроқ бартараф этишга қўлларидан келган барча ишларни қиладиган фидокорона инсонлар меҳнат қилишади.
Шуни алоҳида таъкидлаш жоизки, Ўзбекистон ёқилғи-энергетика комплексининг кенг кўламли тизими ходимларидан ҳеч бири электр таъминотидаги узилишлардан манфаатдор эмас, ҳар биримиз ўз ўрнида меҳнат қилиб, умумий ишимизнинг асосий мақсади — халқимиз ва мамлакатимиз иқтисодиётини энергия ресурслари билан барқарор таъминлашдан иборатдир.
Аммо энергия таъминоти тизимида бу анча мураккаб жараён. Ускуналар техник хизмат кўрсатиш ва модернизация ишларининг кечикишига чидай олмайди. Улар эскиради ва натижада шу каби носозликларга олиб келади. Бундан ташқари, эски ускуналар шунчаки янги қувватларга бардош бера олмайди. Бу эса бугунги кунда 25 йилдан ортиқ вақт давомида энергетика тизимининг ҳолатига етарлича эътибор берилмагани натижасидир», — дейди вазирлик матбуот котиби.
Элмира Бекмуродова электр энергияси таъминотида бўлаётган узилишларга эски ускуналар сабаб бўлаётганини таъкидлаб ўтган.«Сўнгги икки ярим йил ичида соҳада катта ишлар амалга оширилди. Аммо йигирма беш йиллар давомида ишлаб келган ва эскириб улгурган ускуналарни қисқа фурсатларда янгилашнинг имкони йўқ», — дейди у.
Вазирлик матбуот котиби аҳолидан вазиятни тўғри тушуниб, олиб борилаётган ишлар натижасидаги ўзгаришларни тўғри таҳлил қилишини исташини айтган.
«Масалан, 5 йил олдин ҳам Самарқанд ва Бухоро сингари тарихий ва сайёҳларга бой шаҳарларда электр энергиясининг узилиши бир неча кун ва белгиланган жадвалда давом этар эди. Бугунги кунда, тизимда юзага келаётган муаммоларни ўртача 1—2 соатда ёки ҳатто ундан ҳам камроқ муддатда ҳал қилаётган таъмирлаш бригадаларига яна бир бор раҳмат дейман.
Улар бировнинг хатосини тузатгани учун эмас, балки улар энергетика тизимида қандай ишлашини билганим учун мен уларга чин дилдан ташаккур айтаман. Улар эскирган симларни янгилаш, ишлаб чиқаришни кўпайтириш, яъни электр энергиясини ишлаб чиқариш учун қанча иш қилиш кераклигини тушунишади.
Улар бу муаммоларга бир қанча омиллар таъсир қилишини, жумладан, гидроэлектр станцияларнинг самарадорлигига таъсир қилувчи сув танқислигини тушунадилар. Бизнинг мамлакатимизда ҳам кўплаб мамлакатларда юзага келадиган кенг кўламли электр энергиясидаги узилишлар содир бўлмаслиги учун бу ҳақда қизиқишади, ўқишади ва бундай ҳолатнинг олдини олиш учун нималар қилиш кераклигини таҳлил қилишмоқда. Мен бугун нафақат норозиликларни, балки вақтинчалик узилиш сабабларини ва мамлакатимизда барқарор энергия таъминотимиз учун кўрилаётган чораларни тушунишингизни истардим», — дейди Элмира Бекмуродова.
Изоҳ (0)