Toshkent metropolitenining bir qator bekatlarida 7-iyul kuni elektr energiyasi o‘chib qoldi. Holat aks etgan foto va videolar ijtimoiy tarmoqlarda tarqaldi.
“O‘zbekiston temir yo‘llari” kompaniyasi matbuot xizmatidan “Daryo”ga ma’lum qilishlaricha, Toshkent metropoliteni bekatlaridagi yoritish uskunalari, eskalatorlar, turniketlar “shahar (elektr tarmoqlari)ga ulangan”, shu bois “shaharning yarmida svet o‘chgan vaqtda (soat 12:55 dan 13:05 gacha bo‘lgan oraliqda) bekatlarda ham chiroqlar o‘chib qolib, eskalatorlar ishlamay qolgan”.
“Toshkent metropoliteni” matbuot xizmatining ma’lum qilishicha, 7-iyul kuni soat 12:55-13:05 oralig‘ida shahar elektr ta’minoti tizimida yuzaga kelgan nosozlik sababli Chilonzor, Yunusobod, O‘zbekiston yo‘llarida bekatlarni yorituvchi uskunalar ishlamagan, eskalatorlar to‘xtagan. Poyezdlar harakatlanishi esa davom etgan, “chunki poyezdlarning harakatini ta’minlovchi elektr ta’minoti alohida”. Metropoliten matbuot xizmati keltirilgan noqulayliklar uchun uzr so‘ragan.
Ijtimoiy tarmoqlarda qayd etilishicha, ko‘rsatilgan vaqtda poytaxtning aksariyat chorrahalarida svetoforlar ishlamay qolgan, “shahar markazidagi banklar ham chiroqsiz, dizel-generatorlarda o‘tiribdi”. “Elektr bilan bog‘liq vaziyat hammayoqda birdan yaxshilanishi uchun aynan qayerda chiroq o‘chishi kerakligini men bilaman, lekin aytmayman”, — deb vaziyatga izoh bergan bloger @kurbanoffnet.
Eslatib o‘tamiz, bundan avval Toshkent metropoliteni Halqa yo‘lining 7-bekatida 7-may kuni soat 21:10 da elektr energiyasi o‘chib qolgandi. Uzilish shaharda sodir bo‘lgan, bu stansiyadagi 100 dona lampadan iborat yoritish tizimi o‘chishiga olib kelgan. Hodisa metro poyezdlari harakatiga ta’sir ko‘rsatmagandi.
Izoh (0)