Yevro—2020 yarim finalida klassik to‘qnashuv. Barchasi Italiya — Ispaniya uchrashuvi haqida

Yevropa chempionati—2020 musobaqasi yakunlanib qoldi. “Uembli”da o‘tadigan uchta o‘yindan keyin musobaqa g‘olibi nomi ma’lum bo‘ladi. 6-iyul oqshomida futbol olamini klassik bellashuv kutmoqda.

Italiya

Italiya terma jamoasi guruh bosqichida Turkiya va Shveysariyani yirik hisobda mag‘lub etib, pley-off masalasini hal qildi. Zaxira tarkib esa Uelsni “amalladi”. Pley-off bosqichidagi o‘yinlar Manchini shogirdlari uchun oson bo‘lmadi. Avstriya pressingda yaxshi harakat qilib, qo‘shimcha bo‘limlargacha chidab berdi. Roberto Manchini muvaffaqiyatli zaxira almashtirishlari evaziga natijani o‘z tomoniga og‘dira oldi. Chorak finalda Belgiya qiyinchilik bilan taslim etildi.

Italiya ketma-ket 13 o‘yindan buyon g‘alabali seriya qayd etmoqda. Shuningdek, Manchini jamoasi 32 uchrashuvdan beri mag‘lubiyat nimaligini bilmay kelmoqda. Bu musobaqada muxlislar noodatiy Italiyani ko‘rmoqda. Jamoa diqqatni to‘p nazoratiga qaratgan, aniq hujum chizmalariga ega va 4-3-3 uslubida o‘ynamoqda. Biroq Italiyani xuddi shunday uslubga ega Ispaniyaga qarshi o‘yin kutmoqda. Katta ehtimol bilan Italiya bu bahsda to‘pni raqibiga topshiradi va Ispaniyaning xatosini kutadi. Chiro Immobile ispanlarning yosh markaziy himoyachilariga haqiqiy bosh og‘rig‘i bo‘lishi kutilmoqda.

O‘yin oldidan italyanlarda bitta muammo bor. Jamoaning eng yaxshi chap qanot himoyachisi Leonardo Spinatssola jarohat sabab safdan chiqdi. Uning o‘rnini Emerson egallashi taxmin qilinmoqda. Musobaqa kashfiyotlaridan bo‘lgan va o‘z o‘yini bilan ko‘plab grand klublarning e’tiborini o‘ziga qaratgan futbolchi o‘rnini amaldagi YChL g‘olibi egallaydi. Biroq Emerson “Chelsi”da o‘z chizig‘ida Ben Chiluell va Markos Alonsodan keyingi o‘yinchi futbolchi hisoblanadi. O‘tgan mavsum u APLda bor-yo‘g‘i ikki o‘yin o‘tkazdi.

Ispaniya

Ispaniya terma jamoasining yarim finalga qadar bosib o‘tgan yo‘li oson bo‘lmadi. Avvaliga jamoa Shvetsiya va Polsha qarshi bahslarda foydalanilmagan vaziyatlar bilan yodda qoldi. Biroq “qizil furiya” keyingi ikki o‘yinda Slovakiya va Xorvatiyaga beshtadan gol urdi. Shveysariya bilan o‘yin penaltilar seriyasiga qadar bordi, Unai Simonning seyvlari ispanlarni keyingi bosqichga olib chiqdi.

Luis Enrike jamoasi qanday o‘yin namoyish qilishini oldindan taxmin qilish qiyin bo‘lmoqda. Ispaniyaning barcha chizig‘ini mukammal deb bo‘lmaydi. Hujumda vaziyatlardan foydalanish darajasi juda past bo‘lsa, markaziy himoyaga yetakchi yetishmayapti. Darvoza ham yosh posbonga ishonib topshirilgan. Yarim himoya Serxio Buskets safga qaytganidan keyin biroz o‘ziga keldi. Alvaro Morata bu o‘yinda “Yuventus”dagi sheriklari Leonardo Bonuchchi va Jorjio Kyelliniga qarshi kurashishiga to‘g‘ri keladi.

Ispaniya ham raqibi singari mag‘lubiyatsiz seriyaga ega, Enrike jamoasi ketma-ket 13 uchrashuvdan beri mag‘lubiyat nimaligini bilmay kelmoqda. Mazkur Yevropa chempionatida Ispaniya italyanlar kabi top-jamoaga qarshi o‘ynamadi. Shu tufayli pirineyliklar kuchli jamoaga qarshi nima taklif qilishi juda qiziq.

Taxminiy tarkiblar

Murabbiylar fikri

Ispaniya Belgiyadan farq qilsa ham, bu oson o‘yin bo‘lmaydi. Bu o‘yin avvalgi uchrashuvimizdan farq qiladi, biroq qiyinchiliklar kam bo‘lmaydi. Ispaniya uzoq yillar dominantlik qildi. Ularda avlodlar almashinuvi bo‘ldi, jamoa yoshardi, biroq ularda hamon ajoyib futbolchilar va kuchli murabbiy bor.

Roberto Manchini, Italiya bosh murabbiyi

Ikkala jamoa o‘yinda to‘liq nazoratni o‘z qo‘liga olishi juda qiyin. Bu kurashda kimning yutib chiqishini kuzatish qiziqarli. Italiyada yuqori darajali futbolchilar bor, biroq asosiysi — bu haqiqiy jamoa. Ular jamoa bo‘lib hujumga o‘tadi va himoyalanadi, xuddi biz kabi. Ikki jamoa ham imkoniyatlar bo‘ladi.

Luis Enrike, Ispaniya terma jamoasi bosh murabbiyi