Yevro—2020 boshlanishidan avval musobaqaning to‘purari kim bo‘lishi haqida muhokamalar bo‘lib o‘tgandi. Negadir Chiro Immobilening ismi deyarli tilga olinmadi.
Chiro “Stadio Olimpiko” stadionidan uzoq bo‘lmagan joyda istiqomat qiladi va “Latsio” sharafini himoya qiladi. 2019/20-yilgi mavsumda 36 ta gol urib, “Oltin butsa”ni qo‘lga kiritgan edi. O‘sha vaqtda u bir mavsumdagi gollari soni bo‘yicha A Seriya rekordini takrorlagandi (Jino Rosetti 1928/29-yilgi mavsumda, Gonsalo Iguain 2015/16-yilgi mavsumda 36 ta gol urgan).
O‘tgan mavsumda esa bu natijani takrorlay olmadi. Shunday bo‘lsa ham raqiblar darvozasiga 20 ta gol urishga muvaffaq bo‘ldi. Uning A Seriyadagi statistikasi: 260 o‘yinda 155 ta gol. Yomon emas.
31 yoshli hujumchining Yevro—2020 dastlabki ikki turida Turkiya va Shveysariya darvozasini ishg‘ol qilishi hayratlanarli emas.
Hozirda uning natijalarini tanqid qilish ham g‘alati bo‘lardi, lekin yashirmaslik kerak, Chironing terma jamoadagi ishlari doim ham ko‘ngildagidek kechmaydi. 2017-yil JCh—2018 yo‘lida Shvetsiyaga qarshi pley-off o‘yinida Italiya birorta gol ura olmagan, Immobile o‘sha bahsda hujum chizig‘ida o‘ynagandi. Shu tariqa terma jamoa 1958-yildan keyin ilk marta Jahon Chempionatiga chiqa olmagan edi. Aslida bu Chiro uchun ikki yil davom etadigan golsiz seriyaning boshlanishi edi. “Gol ura olmasangiz, yuragingizdagi og‘riq kuchayib boraveradi”, — tan oladi Chiro 2019-yil sentabr oyida Finlyandiya darvozasini ishg‘ol qilganidan so‘ng. “To‘g‘risini aytganda, boshqalarning muammoni bo‘rttirib ko‘rsatishga bo‘lgan urinishlari menga og‘ir botdi”, — degandi Immobile.
Roberto Manchini Italiya terma jamoasi murabbiyiga aylanganidan so‘ng uning oldida qiziq bir dilemma paydo bo‘ldi: dunyoning eng yaxshi to‘purar futbolchilaridan birini termaga chaqirishi mumkin, lekin o‘sha hujumchining terma jamoa uchun foydasi juda kam teggan. Arzirmikan?
Dastlab Manchini tanqidchilarning ovozini o‘chirish uchun Mario Balotelliga “yuzinchi” imkoniyatni berdi. Keyin esa tezkor Kevin Lazanye va ikkinchi qavat qiroli Leonardo Pavoletti o‘z imkoniyatiga ega bo‘ldi. Hammaning yodidan chiqib ketgan noyob iste’dod sohibi Pyetro Pellegri ham terma jamoadan chaqiruv oldi. Qanchadir muddat Moyze Kin va Fabio Kualyarella juftligi ishonchli harakat qildi.
Italiya hujumchisiz o‘ynagan vaqtlarda Immobile xursand bo‘lmagani aniq. Masalan, Ukrainaga qarshi o‘yinda (2018-yilda bo‘lib o‘tgan o‘rtoqlik uchrashuvi) Federiko Bernardeski “yolg‘onchi to‘qqizlik” vazifasini bajardi. Manchini Chiroga bo‘lgan ishonchini yo‘qotgandek tuyulgandi, aslida esa unday emas. U klub darajasida juda yaxshi harakat qilardi. Ammo murabbiyning shubhalari chekinmagandi, u hujumchining o‘ziga bo‘lgan ishonchsizligi ortda qolishini kutardi. Saralash bosqichida italiyalik mutaxassis “Peskara”dan bo‘lgan davolab bo‘lmas kashanda Zdenek Zeman tarbiyalagan Insinye, Veratti va Immobile uchligidan foydalanishga qaror qildi. Futbolchilar bir-birini juda yaxshi tushunardi va hujumni yaxshi ko‘rardi, shuning uchun Manchini ularga imkon berayotganidan xursand edi.
Barchasi ko‘ngildagidek bo‘lmadi, lekin Manchinining murabbiylik uslubi Chiroga ajoyib ta’sir o‘tkazdi. Millatlar Ligasida Niderlandiya darvozasini ishg‘ol qila olmagan Immobilega Manchini: “Polshaga gol urasan”, — degan edi.
Bu orada Stefano Sensi, Nikolo Barella va Lorenso Pellegrini kabi yarim himoyachilar gol urardi. Ko‘pchilikda Italiyaga hujumchi kerakmikan, degan savol paydo bo‘ldi, lekin Manchini darrov tanqidchilarning og‘zini yopdi: “U qachon maydonga chiqsa, bizni xursand qilgan”. U hujumchining “Latsio”dagi 20 ta golini ta’kidlardi.
“Biz doim ham ko‘risha olmaymiz, bu esa barchasini murakkablashtiradi. Agar 38 ta o‘yin ketma-ket o‘tkazganimizda, Chiro Italiya uchun 25 ta gol urardi”.Vaqt o‘tishi bilan Italiya unga mos uslubni tanladi. Immobile Yevro—2020 ning ochilish o‘yinida Italiya safidagi 14-golini urdi. Bu uning yirik musobaqalardagi dastlabki gol edi (JCh—2014 va Yevro—2016 da asosiy futbolchi emasdi). Ammo hozirgi jamoada uni qadrlashlarini va unga ishonishlarini his qiladi, demak gollar ham yetarlicha bo‘ladi. Italiya terma jamoasi uy o‘yinlarini “Latsio” stadionida o‘tkazishi shunchaki tasodif emas.
Italiyada hujum chizig‘i bilan bog‘liq muammo bartaraf etildi. Chiro Immobile har bir o‘yinda gol urishga tayyor.
Italiya terma jamoasi Yevro—2020 ning A guruhida 9 ochko to‘plab, birinchi o‘rin bilan pley-off bosqichiga yo‘l oldi. Nimchorak finalda “Skuadra Adzurra” Avstriyani 2:1 hisobida taslim etdi. Chorak finalda esa Belgiyani ham xuddi shunday hisobda mag‘lubiyatga uchratdi va yarim finalga yo‘l oldi. Chiro Immobile hisobida hozircha 2 ta gol mavjud.
6-iyul, seshanba tunida Yevro—2020 musobaqasining yarim final o‘yini bo‘lib o‘tadi. Italiya “Uembli” stadionida Ispaniyaga qarshi bahs olib boradi. Uchrashuv Toshkent vaqti bilan 00:00 da start oladi.
Izoh (0)