Евро—2020 ярим финалида классик тўқнашув. Барчаси Италия — Испания учрашуви ҳақида

Европа чемпионати—2020 мусобақаси якунланиб қолди. «Уэмбли»да ўтадиган учта ўйиндан кейин мусобақа ғолиби номи маълум бўлади. 6 июль оқшомида футбол оламини классик беллашув кутмоқда.

Италия

Италия терма жамоаси гуруҳ босқичида Туркия ва Швейцарияни йирик ҳисобда мағлуб этиб, плей-офф масаласини ҳал қилди. Захира таркиб эса Уэльсни «амаллади». Плей-офф босқичидаги ўйинлар Манчини шогирдлари учун осон бўлмади. Австрия прессингда яхши ҳаракат қилиб, қўшимча бўлимларгача чидаб берди. Роберто Манчини муваффақиятли захира алмаштиришлари эвазига натижани ўз томонига оғдира олди. Чорак финалда Бельгия қийинчилик билан таслим этилди.

Италия кетма-кет 13 ўйиндан буён ғалабали серия қайд этмоқда. Шунингдек, Манчини жамоаси 32 учрашувдан бери мағлубият нималигини билмай келмоқда. Бу мусобақада мухлислар ноодатий Италияни кўрмоқда. Жамоа диққатни тўп назоратига қаратган, аниқ ҳужум чизмаларига эга ва 4-3-3 услубида ўйнамоқда. Бироқ Италияни худди шундай услубга эга Испанияга қарши ўйин кутмоқда. Катта эҳтимол билан Италия бу баҳсда тўпни рақибига топширади ва Испаниянинг хатосини кутади. Чиро Иммобиле испанларнинг ёш марказий ҳимоячиларига ҳақиқий бош оғриғи бўлиши кутилмоқда.

Ўйин олдидан итальянларда битта муаммо бор. Жамоанинг энг яхши чап қанот ҳимоячиси Леонардо Спинаццола жароҳат сабаб сафдан чиқди. Унинг ўрнини Эмерсон эгаллаши тахмин қилинмоқда. Мусобақа кашфиётларидан бўлган ва ўз ўйини билан кўплаб гранд клубларнинг эътиборини ўзига қаратган футболчи ўрнини амалдаги ЕЧЛ ғолиби эгаллайди. Бироқ Эмерсон «Челси»да ўз чизиғида Бен Чилуэлл ва Маркос Алонсодан кейинги ўйинчи футболчи ҳисобланади. Ўтган мавсум у АПЛда бор-йўғи икки ўйин ўтказди.

Испания

Испания терма жамоасининг ярим финалга қадар босиб ўтган йўли осон бўлмади. Аввалига жамоа Швеция ва Польша қарши баҳсларда фойдаланилмаган вазиятлар билан ёдда қолди. Бироқ «қизил фурия» кейинги икки ўйинда Словакия ва Хорватияга бештадан гол урди. Швейцария билан ўйин пенальтилар сериясига қадар борди, Унаи Симоннинг сейвлари испанларни кейинги босқичга олиб чиқди.

Луис Энрике жамоаси қандай ўйин намойиш қилишини олдиндан тахмин қилиш қийин бўлмоқда. Испаниянинг барча чизиғини мукаммал деб бўлмайди. Ҳужумда вазиятлардан фойдаланиш даражаси жуда паст бўлса, марказий ҳимояга етакчи етишмаяпти. Дарвоза ҳам ёш посбонга ишониб топширилган. Ярим ҳимоя Серхио Бускетс сафга қайтганидан кейин бироз ўзига келди. Альваро Мората бу ўйинда «Ювентус»даги шериклари Леонардо Бонуччи ва Жоржио Кьеллинига қарши курашишига тўғри келади.

Испания ҳам рақиби сингари мағлубиятсиз серияга эга, Энрике жамоаси кетма-кет 13 учрашувдан бери мағлубият нималигини билмай келмоқда. Мазкур Европа чемпионатида Испания итальянлар каби топ-жамоага қарши ўйнамади. Шу туфайли пиринейликлар кучли жамоага қарши нима таклиф қилиши жуда қизиқ.

Тахминий таркиблар

Мураббийлар фикри

Испания Бельгиядан фарқ қилса ҳам, бу осон ўйин бўлмайди. Бу ўйин аввалги учрашувимиздан фарқ қилади, бироқ қийинчиликлар кам бўлмайди. Испания узоқ йиллар доминантлик қилди. Уларда авлодлар алмашинуви бўлди, жамоа ёшарди, бироқ уларда ҳамон ажойиб футболчилар ва кучли мураббий бор.

Роберто Манчини, Италия бош мураббийи

Иккала жамоа ўйинда тўлиқ назоратни ўз қўлига олиши жуда қийин. Бу курашда кимнинг ютиб чиқишини кузатиш қизиқарли. Италияда юқори даражали футболчилар бор, бироқ асосийси — бу ҳақиқий жамоа. Улар жамоа бўлиб ҳужумга ўтади ва ҳимояланади, худди биз каби. Икки жамоа ҳам имкониятлар бўлади.

Луис Энрике, Испания терма жамоаси бош мураббийи