Forbes talqini bo‘yicha dunyoning eng boy kishisi Jeff Bezos Amazon rahbari lavozimidan ketganidan so‘ng e’tiborini boshqa loyihalarga qaratmoqchi, shuningdek, u tez orada koinotga parvoz qiladi.
Jeff Bezos 5-iyul kuni o‘zi asos solgan Amazon kompaniyasi bosh direktori lavozimidan ketmoqda. Lavozim Amazon Web Services kompaniyasi sobiq rahbari Endryu Jessiga topshiriladi. Biroq Bezos boshqaruv kengashi raisi bo‘lib qoladi.
Ketish uchun Bezos tanlagan sana ramziy ma’noga ega, shu kuni asosiy biznes loyihasi tashkil etilganiga roppa-rosa 27 yil to‘ldi.
Amazon — kitoblar sotadigan veb-sayt sifatida ish boshlagan va qiziq ustida Cadabra deb nomlanishiga sal qolgan. O‘tgan yillar davomida kompaniya nafaqat onlayn tijorat doirasini kengaytirdi, balki yangi bozor o‘rinlarini ham o‘zlashtirdi — 200 million obunachiga ega bo‘lgan onlayn kinoteatrdan tortib “bulutli” hisoblash servislari yoki maishiy elektronika ishlab chiqarishgacha. Umuman olganda, kompaniya 40 ga yaqin turli xil brend va sho‘ba korxonalarga egalik qiladi.
1997-yilda Amazon aksiyalari birjaga chiqarilganda 18 dollardan sotilgan edi, hozir ularning har biri narxi 3,5 ming dollardan yuqori, bosh qarorgohi Sietlda bo‘lgan kompaniyaning umumiy kapitalizatsiyasi 1,7 trillion dollardan oshadi.
Amazonda 1,3 millionga yaqin kishi ishlaydi. Ish sharoitlarining qiyinligi uchun doimiy ravishda tanqid qilinsa-da, kompaniya soatiga kamida 15 dollar maosh to‘laydi — bu federal minimumdan ikki baravar ko‘p.
Bezosning o‘zi 177 milliard dollar boyligi bilan Forbes’ning dunyodagi eng boy ishbilarmonlari ro‘yxatida yetakchilik qilmoqda.
Endryu Jessiga direktorlik lavozimini topshirgandan so‘ng 57 yoshli Bezos kompaniyaning raisi bo‘lib qoladi va aksiyalarning 10 foizidan ko‘prog‘iga egalik qilishda davom etadi. U kompaniyaning istiqbolli mahsulotlariga e’tiborini qaratmoqchi va boshqa aktivlariga, shu jumladan, xayriya fondlari, The Washington Post gazetasi va Blue Origin kosmik kompaniyasiga ko‘proq vaqt ajratish niyatida.
Jeff Bezos 20-iyul kuni Blue Origin kompaniyasining kosmik kemasida ukasi Mark Bezos bilan suborbital parvozni amalga oshiradi. Shuningdek, Bezos 82 yoshli amerikalik uchuvchi ayol Uolli Fankni o‘zi bilan birga koinotga uchishga taklif qildi.
Izoh (0)