Tojikiston prezidenti Emomali Rahmon 5-iyul kuni tojik-afg‘on chegarasidagi vaziyat keskinlashgani tufayli Xavfsizlik kengashining favqulodda yig‘ilishini o‘tkazdi. Bu haqda Asia-Plus xabar berdi.
Uchrashuvda Xavfsizlik kengashining doimiy a’zolari, harbiy tuzilmalar va huquqni muhofaza qiluvchi organlarning rahbarlari ishtirok etgan.
Yig‘ilishda chegara hududlarida xavfsizlikni ta’minlash va davlat chegarasida qo‘riqlash choralarini kuchaytirish masalalari muhokama qilingan.
Chegara qo‘shinlari qo‘mondoni Rajabali Rahmonali hamda ichki ishlar vaziri Ramazon Rahimzoda chegaradagi vaziyat yuzasidan hisobot bergan.
“Davlat rahbari Emomali Rahmon Afg‘oniston va Tojikiston chegaralaridagi vaziyatning keskinlashganini e’tiborga olgan holda davlat va chegaradagi xalq xavfsizligini ta’minlash uchun aniq choralarni ko‘rish haqida buyruq berdi”, – deyilgan Tojikiston prezidentining rasmiy veb-saytida.
Shuningdek, yig‘ilishda kuchishlatar tizimlar vakillariga davlat chegarasida himoyani kuchaytirish, kerakli hududlarga qo‘shimcha qo‘shin yuborish vazifasi ham yuklangan.
Qayd etilishicha, Tojikiston prezidenti chegarani buzib o‘tish holatlariga katta e’tibor qaratish, mazkur harakatlarning transmilliy jinoyat ekanligi haqida ogohlantirish ishlarini olib borish, terrorchilik, ekstremizm va giyohvand moddalarning noqonuniy savdosiga qarshi kurashish yuzasidan ham topshiriqlar bergan.
Yig‘ilish yakunida Emomali Rahmon mudofaa vaziriga 20 ming nafar harbiy rezerv vakillarini Tojikiston hamda Afg‘oniston chegarasini mustahkamlashga yuborishni tayinlagan.
Avval “Tolibon” bilan to‘qnashuvdan so‘ng 1000 dan ortiq afg‘onistonlik harbiylar Tojikistonga chekingani, Shavkat Mirziyoyev va Emomali Rahmon Afg‘onistondagi keskinlikning kuchayishi bilan bog‘liq vaziyatni muhokama qilgani haqida xabarlar berilgan.
Shuningdek, 3-iyul kuni “Tolibon” bilan to‘qnashuvdan keyin 300 dan ortiq afg‘onistonlik harbiylar Tojikistonga chekingan, undan oldin “Tolibon” Afg‘onistonning Tojikiston bilan chegaradagi hududini egallab olgan hamda tojik—afg‘on chegarasidagi vaziyat keskin deb baholangan. Keyinchalik Afg‘onistonda hukumat qo‘shinlari “Tolibon” jangarilarini mamlakat shimolidagi bir nechta tumanlardan siqib chiqargan. AQSh davlat kotibi Entoni Blinken Afg‘onistondan AQSh qo‘shinlari olib chiqib ketilgach, mamlakatda hokimiyat tepasiga “Tolibon” harakati vakillari kelishi mumkinligini istisno qilmagandi.
Afg‘onistondan NATO qo‘shinlarini olib chiqish 29-aprelda boshlangan, AQSh va “Tolibon” o‘rtasida tuzilgan kelishuvga binoan jarayon kuzda yakunlanishi kerak. Bugunga qadar Germaniya va Italiya Afg‘onistondan o‘z qo‘shinlarini olib chiqishni yakunlagan.
Izoh (0)