Samarqand shahrida jarima maydonchasiga avtomashinasi kiritilgan haydovchi YPX xodimiga pora berayotganda ushlandi, deya xabar bermoqda viloyat IIB.
Ma’lum qilinishicha, 2021-yilning 30-iyun kuni soat 20:10 larda Samarqand shahrining Dahbed ko‘chasidan harakatlanib kelgan Nexia-2 rusumli avtomashina YPX inspektorining to‘xtash ishorasiga bo‘ysunmay, harakatini davom ettirib, qochib ketgan.
Haydovchi boshqa chorrahada to‘xtatilib, hujjatlari tekshirilganda haydovchilik guvohnomasi yo‘qligi, tegishli ruxsatnomasiz avtomashinaning old va yon oynalari tusini o‘zgartirilganligi aniqlanib, tegishli tartibda rasmiylashtirilgan.
Shundan so‘ng, 2021-yilning 1-iyul kuni haydovchi YPX inspektorining oldiga kelib, jarima maydonida turgan avtomashinasini chiqarib berish evaziga 200 AQSH dollari miqdoridagi pullarni pora sifatida taklif qilgan.
Inspektor fuqaroga ushbu harakati noqonuniyligi, pora berish jinoyat ekanligini tushuntirishiga qaramasdan, haydovchi ushbu niyatidan qaytmagan. YPX inspektori holat yuzasidan viloyat IIB boshlig‘i nomiga bildirgi bilan murojaat qilgan.
Xodimning bildirgisiga asosan huquqni muhofaza qiluvchi organ xodimlari hamkorligida o‘tkazilgan tezkor tadbir davomida haydovchi YPX inspektoriga 100 AQSh dollarini pora tariqasida bergan vaqtda ushlangan.
Holat yuzasidan Samarqand shahar prokuraturasi tomonidan tergovga qadar tekshiruv harakatlari olib borilmoqda.
Bundan avval Buxoroda pora bilan qo‘lga olingan viloyat Sanitariya-epidemiologiya xizmati rahbari 3 yil muddatga ozodlikdan mahrum qilingani, Farg‘onada YPX inspektoriga 2 mln so‘m pora bergan haydovchi qo‘lga olingani hamda Surxondaryoda 50 sotix yerni o‘ziga tegishli ekanligiga ishontirib, 150 mln so‘mga sotmoqchi bo‘lgan shaxs ushlangani haqida xabar berilgandi.
Izoh (0)