Самарқанд шаҳрида жарима майдончасига автомашинаси киритилган ҳайдовчи ЙПХ ходимига пора бераётганда ушланди, дея хабар бермоқда вилоят ИИБ.
Маълум қилинишича, 2021 йилнинг 30 июнь куни соат 20:10 ларда Самарқанд шаҳрининг Даҳбед кўчасидан ҳаракатланиб келган Nexia-2 русумли автомашина ЙПХ инспекторининг тўхташ ишорасига бўйсунмай, ҳаракатини давом эттириб, қочиб кетган.
Ҳайдовчи бошқа чорраҳада тўхтатилиб, ҳужжатлари текширилганда ҳайдовчилик гувоҳномаси йўқлиги, тегишли рухсатномасиз автомашинанинг олд ва ён ойналари тусини ўзгартирилганлиги аниқланиб, тегишли тартибда расмийлаштирилган.
Шундан сўнг, 2021 йилнинг 1 июль куни ҳайдовчи ЙПХ инспекторининг олдига келиб, жарима майдонида турган автомашинасини чиқариб бериш эвазига 200 АҚШ доллари миқдоридаги пулларни пора сифатида таклиф қилган.
Инспектор фуқарога ушбу ҳаракати ноқонунийлиги, пора бериш жиноят эканлигини тушунтиришига қарамасдан, ҳайдовчи ушбу ниятидан қайтмаган. ЙПХ инспектори ҳолат юзасидан вилоят ИИБ бошлиғи номига билдирги билан мурожаат қилган.
Ходимнинг билдиргисига асосан ҳуқуқни муҳофаза қилувчи орган ходимлари ҳамкорлигида ўтказилган тезкор тадбир давомида ҳайдовчи ЙПХ инспекторига 100 АҚШ долларини пора тариқасида берган вақтда ушланган.
Ҳолат юзасидан Самарқанд шаҳар прокуратураси томонидан терговга қадар текширув ҳаракатлари олиб борилмоқда.
Бундан аввал Бухорода пора билан қўлга олинган вилоят Санитария-эпидемиология хизмати раҳбари 3 йил муддатга озодликдан маҳрум қилингани, Фарғонада ЙПХ инспекторига 2 млн сўм пора берган ҳайдовчи қўлга олингани ҳамда Сурхондарёда 50 сотих ерни ўзига тегишли эканлигига ишонтириб, 150 млн сўмга сотмоқчи бўлган шахс ушлангани ҳақида хабар берилганди.
Изоҳ (0)