Shahzoda Garri va Uilyam Kensington bog‘i hududida marhuma onasi malika Dianaga atab haykal o‘rnattirdi. Haykal aka-ukaning tashabbusi bilan malikaning 60 yilligi sharafiga qad rostlagan. Bu haqda Kembrij gersogi va gersoginyasi o‘zlarining Instagram’dagi sahifasida ma’lum qildi, deb xabar beradi Esquire.
“U har kuni biz bilan bo‘lishini xohlar edik va umidimiz shundan iboratki, ushbu haykal uning hayoti va merosi razmi sifatida ko‘rilsin”, — deyiladi aka-ukaning qo‘shma bayonotida. Malika Diana Parijda sodir bo‘lgan YTH oqibatida halok bo‘lgan, o‘shanda shahzodalar Garri va Uilyam mos ravishda 12 va 15 yoshda edi.
Haykalning ochilish marosimida malika Diananing oila a’zolaridan tashqari, haykaltarosh Ian Rank-Brodli, bog‘ning qayta dizaynini yaratish bilan shug‘ullangan landshaft dizayner Pip Morrison ishtirok etgan. Morrisonning so‘zlariga ko‘ra, ushbu bog‘ malikaning sevimli joyi bo‘lgan. Bog‘ni qayta ta’mirlash ishlari 2019-yilning oktabrida boshlangan va ming ish soati davomida to‘rt mingdan ortiq gullar ekilgan.
Avvalroq shahzoda Charlz — malika Diananing sobiq turmush o‘rtog‘i haykalning ochilishiga kelgan o‘g‘li shahzoda Garri bilan uchrashmasligi ma’lum bo‘lgandi. Ushbu kunda Charlz Shotlandiyadagi Balmoral qasrida bo‘lgan. Shuningdek, u Yelizaveta II ning turmush o‘rtog‘i Filippning dafn marosimida ham Garri bilan uchrashishdan qochgan edi.
Izoh (0)