Шаҳзода Гарри ва Уильям Кенсингтон боғи ҳудудида марҳума онаси малика Дианага атаб ҳайкал ўрнаттирди. Ҳайкал ака-уканинг ташаббуси билан маликанинг 60 йиллиги шарафига қад ростлаган. Бу ҳақда Кембриж герцоги ва герцогиняси ўзларининг Instagram’даги саҳифасида маълум қилди, деб хабар беради Esquire.
Бронза ҳайкал ака-ука шаҳзодалар томонидан 2017 йилда буюртма қилинган бўлиб, унда малика Диана чап қўлини қизалоқнинг, ўнг қўлини эса болакайнинг елкасига қўйиб тургани тасвирланган.
«У ҳар куни биз билан бўлишини хоҳлар эдик ва умидимиз шундан иборатки, ушбу ҳайкал унинг ҳаёти ва мероси разми сифатида кўрилсин», — дейилади ака-уканинг қўшма баёнотида. Малика Диана Парижда содир бўлган ЙТҲ оқибатида ҳалок бўлган, ўшанда шаҳзодалар Гарри ва Уильям мос равишда 12 ва 15 ёшда эди.
Ҳайкалнинг очилиш маросимида малика Диананинг оила аъзоларидан ташқари, ҳайкалтарош Иан Ранк-Бродли, боғнинг қайта дизайнини яратиш билан шуғулланган ландшафт дизайнер Пип Моррисон иштирок этган. Моррисоннинг сўзларига кўра, ушбу боғ маликанинг севимли жойи бўлган. Боғни қайта таъмирлаш ишлари 2019 йилнинг октябрида бошланган ва минг иш соати давомида тўрт мингдан ортиқ гуллар экилган.
Аввалроқ шаҳзода Чарльз — малика Диананинг собиқ турмуш ўртоғи ҳайкалнинг очилишига келган ўғли шаҳзода Гарри билан учрашмаслиги маълум бўлганди. Ушбу кунда Чарльз Шотландиядаги Балморал қасрида бўлган. Шунингдек, у Елизавета II нинг турмуш ўртоғи Филиппнинг дафн маросимида ҳам Гарри билан учрашишдан қочган эди.
Изоҳ (0)